Son yeniləmə: 27 Yanvar 2022 11:25
Bayraqdar.info – TEKNOFEST Texnologiya Müsabiqəsi çərçivəsində 5-7 Avqust 2022-ci il tarixlərində Trabzonda Nəqliyyatda Süni İntellekt Müsabiqəsi keçiriləcək. Müsabiqədə yüksək yer tutan komandalar mükafatlarını 30 Avqust-4 Sentyabr 2022-ci il tarixlərində Samsun şəhərinin Çərşənbə Hava Limanında keçiriləcək TEKNOFEST-də alacaqlar.
Bu barədə bayraqdar.info-ya yanvarın 27-də Türkiyənin Azərbaycandakı səfirliyindən məlumat verilib.
Bildirlib ki, TEKNOFEST Aviasiya, Kosmos və Texnologiya Festivalı çərçivəsində təşkil edilən Nəqliyyatda Süni İntellekt Müsabiqəsində iştirak etmək üçün müraciətlərin verilməsinə başlanılır: “Bu il CEZERİ, TÜBİTAK və ASELSAN-ın rəhbərliyi ilə keçirilən müsabiqədə bütün nəqliyyat növlərini daha təhlükəsiz və ağıllı edən süni intellekt texnologiyaları və gələcəyə daha sürətlə irəliləyən yeni nəsil ağıllı nəqliyyat sistemləri işlənib hazırlanır”.
Vurğulanır ki, müsabiqə çərçivəsində tələbələr süni intellektə əsaslanan obyektin aşkarlanması sistemi ilə uçan avtomobillərin kamera məlumatlarından istifadə edərək nəqliyyat vasitələrini və insan əşyalarını aşkar edirlər. Orta məktəb, universitet tələbələri və məzunların fərdi və ya komanda şəklində iştirak edə biləcəyi müsabiqə üçün son müraciət tarixi 28 fevraldır.
TEKNOFEST çərçivəsində müxtəlif kateqoriyalar üzrə təşkil edilən Texnologiya Müsabiqələri tələbələrin texniki bacarıqlarını təkmilləşdirməklə yanaşı, vəzifə və məsuliyyət daşıma şüurlarını da artırır. Müsabiqə meydançalarında komanda şəklində işləmək ruhunu daha səmərəli qaydada öyrənən tələbələr də öz səyləri sayəsində nüfuzlu mükafatlar qazanırlar.
Nəqliyyatda Süni İntellekt Müsabiqəsində özlərinin enerji və səylərini müsabiqə meydançasında nümayiş etdirən iştirakçılara Ən Yaxşı Komanda Ruhu Mükafatı da verilir. Bütün tapşırıqları müvəffəqiyyətlə yerinə yetirən və daha yüksək yer tutan komandaları isə ümumilikdə 120 min TL-lik mükafat gözləyir.
