Son yeniləmə: 27 Yanvar 2022 18:07
Bayraqdar.info– Azərbaycan və Türkmənistan arasında Xəzər dənizində “Dostluq” yatağı üzrə Birgə İşçi Qrupunun növbəti iclası keçirilib.
Bu barədə bayraqdar.info-ya yanvarın 27-də İqtisadiyyat Nazirliyindən məlumat verilib. Bildirilib ki, Birgə İşçi Qrupu “Azərbaycan Respublikası Hökuməti ilə Türkmənistan Hökuməti arasında Xəzər dənizində “Dostluq” yatağının karbohidrogen resurslarının birgə kəşfiyyatı, işlənməsi və mənimsənilməsi haqqında Anlaşma Memorandumu”na əsasən, “Dostluq” yatağı üzrə tərəflər arasında əməkdaşlığı tənzimləyəcək hökumətlərarası Saziş layihəsinin hazırlanması və razılaşdırılması məqsədilə yaradılıb.
Birgə İşçi Qrupunun videokonfrans formatında keçirilən dördüncü iclası Azərbaycanın energetika naziri Pərviz Şahbazov və Türkmənistanın dövlət naziri – “Türkmənqaz” Dövlət Konserninin sədri Batır Amanovun həmsədrliyi keşirilib. İşçi Qrupu üzvlərinin də iştirak etdiyi iclasda “Dostluq” yatağı üzrə tərəflər arasında danışıqlar prosesi çərçivəsində tərəqqidən məmnunluq ifadə edilib və layihənin hər iki ölkə üçün əhəmiyyəti vurğulanıb. İşçi Qrupu nəzdində fəaliyyət göstərən Birgə Ekspert Qrupunun növbəti görüşünün yaxın zamanda keçirilməsinə dair razılıq əldə olunub.
Qeyd edək ki, “Dostluq” yatağının karbohidrogen resurslarının birgə kəşfiyyatı, işlənilməsi və mənimsənilməsi üzrə Tərəflər arasında Hökumətlərarası Saziş layihəsinin hazırlanması və razılaşdırılması məqsədilə Azərbaycan tərəfdən İşçi Qrupu Azərbaycan Respublikası Prezidentinin 25 fevral 2021-ci il tarixli Sərəncamı ilə yaradılıb.
