Son yeniləmə: 27 Yanvar 2022 09:45
Bayraqdar.info – Mədəniyyət Nazirliyinin təşkilatçılığı ilə 2022-ci ilin 2-4 fevral tarixlərində Gənclər günü münasibətilə “Yeni gənclik” musiqi günləri adı altında bir neçə konsert keçiriləcək.
Nazirlikdən bayraqdar.info-ya verilən məlumatda bildirilir ki, fevralın 2-də Azərbaycan Dövlət Akademik Filarmoniyasında Q.Qarayev adına Azərbaycan Dövlət Kamera Orkestri ilə (bədii rəhbər və baş dirijor, Xalq artisti Fəxrəddin Kərimov) “Gənclərə dəstək” layihəsinin iştirakçılarının konserti keçiriləcək.
“Azərbaycan Dövlət Mahnı Teatrında gənc caz ifaçılarının “Gaudeamus Jazz” adlı konserti, fevralın 3-də Beynəlxalq Muğam Mərkəzində Ü.Hacıbəyli adına Bakı Musiqi Akademiyasının “Detaşe” violinoçular ansamblının konserti (ansamblın rəhbəri Xalq artisti Zəhra Quliyeva) olacaq.
Fevralın 4-də isə Filarmoniyada Ü.Hacıbəyli adına Azərbaycan Dövlət Simfonik Orkestrinin konserti (dirijor – Mustafa Mehmandarov, solist-pianoçu, Prezident təqaüdçüsü Vüsalə Babayeva (piano)) keçiriləcək.
