Son yeniləmə: 26 Yanvar 2022 12:14
Bayraqdar.info – “SOCAR karbamid” zavodu ixracı genişləndirir.
Bu barədə bayraqdar.info-ya yanavrın 26-da İqtisadiyyat Nazirliyindən məlumat verilib.
Bildirilib ki, Sumqayıt Kimya Sənaye Parkının rezidenti – “SOCAR karbamid” zavodu ölkəmizdə kənd təsərrüfatının inkişafında, həmçinin qeyri-neft ixracında önəmli rola malikdir. Belə ki, son 3 il ərzində zavodda istehsal olunan karbamid gübrəsinin satışı 3 dəfə artmaqla, təxminən 372 min ton təşkil edib.
Qeyd olunub ki, 2021-ci ildə müəssisənin gəlirləri 6 dəfə artaraq 223 milyon manatı ötüb. Müəssisədə istehsal olunan karbamid gübrəsi daxili bazarla yanaşı, xarici bazarlara da çıxarılır. Zavodun məhsullarının 87 faizi Braziliya, Türkiyə, Rumıniya, Rusiya, Bolqarıstan, Albaniya, İtaliya, Gürcüstan və s. ölkələrə ixrac olunur.
Qeyd edilib ki, “SOCAR karbamid” zavodu 2019-cu ilin yanvar ayında fəaliyyətə başlayıb. Müəssisə azot gübrəsi idxalından asılılığın aradan qaldırılması, yerli fermerlərin tələbatının ödənilməsində mühüm rol oynayır.
