Bayraqdar.info – Martın 5-də Almaniyanın Köln şəhərində bu ölkədə çalışan azərbaycanlı həkimlərin I forumu keçiriləcək.
Bu barədə bayraqdar.info-ya yanvarın 24-də Diasporla İş üzrə Dövlət Komitəsindən məlumat verilib.
Bildirilib ki, tədbir Komitənin dəstəyi və Almaniya Azərbaycanlıları Alyansının təşkilatçılığı ilə baş tutacaq. Forumun əsas məqsədi Almaniyanın tibb ocaqlarında nüfuz sahibinə çevrilən azərbaycanlı elm adamlarını və gənc həkimləri bir araya gətirmək, elmi-praktiki mübadilənin aparılması, həkim soydaşlarımız arasında şəbəkələşmənin yaradılmasından ibarətdir.
Forumda azərbaycanlı həkimlərin çıxışları dinləniləcək, tibb sahəsində əldə etdikləri son elmi-praktiki nailiyyətlər və yeniliklər təqdim olunacaq, müzakirələr aparılacaq. Forum həm də xaricdə yaşayan həkim soydaşlarımızın Azərbaycan səhiyyəsinə bəxş edə biləcəyi mühüm töhfələrə diqqəti yönəldəcək.
Forumda Almaniyanın müxtəlif şəhərlərində fəaliyyət göstərən 250 nəfərə yaxın azərbaycanlı həkimin iştirak etməsi nəzərdə tutulub. Forumda iştirak etmək üçün qeydiyyat linki artıqaktivləşdirilib. İştirakçılar bu linkə daxil olmaqla qeydiyyatdan keçə bilərlər.
