Bayraqdar.info – Qardaş Tatarıstanın paytaxtı Kazan şəhərinin mərkəzi küçələrindən biri Qazaxıstanın 1-ci Prezidenti – Elbaşı Nursultan Nazarbayevin adını daşıyır. Lakin bu il yanvarın 2-dən başlayaraq qardaş Qazaxıstanda baş verənlərin ardından N.Nazarbayevlə bağlı müzakirələr də fərqli müstəvidə yürüdülməkdədir. Bəzi mərkəzlər əlindən gələni edir ki, Elbaşının adı da, özü də ümumiyyətlə gözdən salınsın, meydandan sıxışdırılsın. Belə mərkəzlərdən biri də “Rusiya kommunistləri”dir.
Rusiyada nəşr edilən Kommersant qəzetinin verdiyi xəbərə görə, “Rusiya kommunistləri” Qazaxıstanda baş verən hadisələr fonunda Kazan şəhər rəhbərliyinə müraciət edərək N.Nazarbayev küçəsinin adının dəyişdirilməsinə çağırış ediblər. Lakin şəhər rəhbərliyi buna mənfi yanaşıb.
Məsələyə münasibət bildirən Tatarıstan Dövlət Şurasının sədri Fərid Muxametşin isə ümumiyyətlə belə bir addımın mümkün olmadığını deyib. O, Kommersanta verdiyi açıqlamada bildirib ki, “belə bir addım Tatarıstana yaraşmaz”.
Şura sədri onu da əlavə edib ki, küçəyə 2015-ci ildə N.Nazarbayevin adı veriləndə əhalinin müəyyən bir hissəsi narazı olub. Lakin böyük çoxluq bu qərarı dəstəkləyib.
Qeyd edək ki, “Rusiya kommunistləri” “Kazanın mərkəzindəki küçəyə adının verilməsinə haqqı çatan daha layiqli şəxslərin olduğunu” iddia edib…
