Bayraqdar.info – Yanvarın 23-də Kuzey Kıbrıs Türk Cümhuriyyətində növbədənkənar parlament seçkiləri keçiriləcək. Artıq seçkilərə cəmi bir gün qalıb. Bu gün KKTC-də sükut günüdür. Sabah isə xalq seçki mıntəqələrinə gedərək yeni parlamentin tərkibini müəyyən edəcək. Lakin bu seçkilər əvvəlkilərdən xeyli fərqlənir. Çünki bu seçkilərin nəticəsi ilə KKTC-də yeni dönəm başlaya bilər.
Qeyd edək ki, bu 1974-cü ildən bəri Kıbrıs türklərinin sayca 15-ci parlament seçkisidi. KKTC-də 1974-cü ildən bu günə kimi 12 dəfə prezident, 14 dəfə isə parlament, 12 dəfə yerli seçkilər keçirilib. Həmçinin bu günə kimi 5 dəfə referendum keçirilib. KKTC-də prezident və parlament seçkiləri 5 ildən bir, yerli seçkilər isə 4 ildən bir keçirilir.
Bu dəfəki seçkilərdə ölkə üzrə 763 seçki məntəqəsində 203 min 792 seçici səs verəcək. Seçkilərdə 6 rayondan 403 namizəd mübarizə aparır. Onlardan 400-ü 8 siyasi partiyanı təmsil edir, 3-ü isə müstəqil namizəddir.
50 yerdən ibarət parlamentə Lefkoşadan 16, GaziMağusadan 13, Girnədən 11, İskeledən 5, Güzelyurtdan 3 və Lefkedən 2 millət vəkili seçiləcək.
Hazırda Milli Məclisdə UBP, CTP, HP, TDP, DP və YDP olmaqla 6 siyasi partiya təmsil olunur. Yanvarın 23-də keçiriləcək seçkidə isə 8 siyasi partiya iştirak edir. Bunlar arasında Müstəqillik Yolu ilk dəfədir ki, seçkidə iştirak edir.
