Son yeniləmə: 21 Yanvar 2022 17:28
Bayraqdar.info – COVID-19-a qlobal gündəlik yoluxma sayı yeni və olduqca yüksək rekorda çatıb. Yanvarın 20-də yer üzündə qeydə alınmış yoluxma sayı 3 milyon 628 min nəfər təşkil edib. Ona qədərki ən yüksək yoluxma sayı 3 milyon 371 min nəfəri idi. Bu qlobal rəqəm yanvarın 14-də qeydə alınıb.
Statistika worldometers saytında yer alıb.
Rəqəmlərə baxılınca bəlli olur ki, 2022-ci il dekabrın əvvəlinə gündəlik qlobal yoluxma sayı 1 milyondan az olduğu halda qısa bir müddətə bu rəqəm 2 milyona doğru irəliləmiş, az sonra isə 3 milyonu belə aşmışdır. Artıq cəmi 21 günü arxada qalmış yanvar ayında qlobal yoluxma sayı nəinki 2 milyon nəfərdən az olmamış, əksinə, 3 milyonu da aşmışdır.
COVID-19-dan ölüm sayındakı rekord isə 17 min 517 nəfər olmaqla 2021-ci ilin 27 yanvarında qeydə alınıb. 2021-ci ilin sentyabrından bəri qlobal ölüm sayı 10 min nəfərdən aşağıdır.
Mütəxəssislər yoluxma sayının artacağını, ölüm hallarının da uyğun şəkildə çoxalacağını proqnozlaşdırırlar.
Yeri gəlmişkən, dünya üzrə ən çox yoluxma sayı 70 milyon 545 min nəfər olmaqla ABŞ-da qeyd alınıb. Elə ölüm sayında da ABŞ 884 min nəfərlə ən öndə gedir.
