Bayraqdar.info – İqtisadiyyat Nazirliyi yanında Əmlak Məsələləri Dövlət Xidməti tərəfindən yanvarın 18-də növbəti hırrac keçirilib. Bu dəfəki hərracda 28 nəqliyyat vasitəsi özəlləşdirilib.
Nazirlikdən bayraqdar.info-ya verilən məlumata görə hərraca çıxarılan nəqliyyat vasitələrinə ümumilikdə 150 sifariş qəbul olunub: “Bunun 31-i elektron qaydada həyata keçirilib. Hərracda qalib şəxslərdən 4-ü isə onlayn şəkildə iştirak edən sifarişçi olub”.
Məlumatda bildirilib ki, dövlət əmlakının özəlləşdirilməsi sahəsində elektron xidmətlərin tətbiqi, sifariş və hərraclara internet vasitəsilə onlayn şəkildə qatılmaq imkanları hərraclarda iştirakı daha da sadələşdirib: “Bu isə, hərrac iştirakçılarının sayında artıma səbəb olur. Nəqliyyat vasitələrinin əksəriyyətinin hərracının rəqabətli olması buna əyani sübutdur. Məsələn, ilkin satış qiyməti 7 min 500 manat olan “Hyundai Sonata” markalı avtomobilə ən son təklif 2 dəfəyə yaxın artaraq 14 min 000 manat olub. İlkin satış qiyməti 5 min manat olan “Fiat Doblo” markalı avtomobil təklifdən 2 min 500 manat çox olmaqla 7 min 500 manata özəlləşdirilib”.
Vurğulanıb ki, budəfəki hərracda satılmış dövlət əmlakları üzrə 204 min 360 manat vəsaitin dövlət büdcəsinə ödənilməsi nəzərdə tutulur.
Hərracda özəlləşdirilən dövlət əmlakının siyahısı ilə buradan tanış olmaq mümkündür.
Məlumat o da bildirilib ki, növbəti hərraclar 25 yanvar 1, 15 və 22 fevral tarixlərində keçiriləcək.
Hər kəs Xidmətin rəsmi saytından və ya Özəlləşdirmə portalından hərraca çıxarılan dövlət əmlakı üzrə seçim edə bilər. Elektron Xidmətlər Portalından müvafiq hərrac xidmətini seçərək qeydiyyatdan keçib, dövlət əmlakının ilkin hərrac qiymətinin 10 faizi məbləğində behi ödəyib hərracda iştirakçı statusu almaq mümkündür. Sifarişçilər hərraclara onlayn formada da qoşula bilər.
Prosesə marağı olanlar hərrac günü həm Əmlak Xidmətləri Məkanına gəlməklə, həm də Elektron Xidmətlər Portalından “Elektron hərrac” bölməsini seçərək hərracları qeydiyyatsız formada izləyə bilərlər.
