Son yeniləmə: 17 Yanvar 2022 09:29
Bayraqdar.info – Ağcabədi rayonunda növbəti suvarma mövsümünə hazırlıq gedir.
Bu barədə bayraqdar.info-ya yanvarın 17-də Azərbaycan Meliorasiya və Su Təsərrüfatı Açıq Səhmdar Cəmiyyətinin mətbuat katibi Dilqəm Şərifov bildirib.
Onun sözlərinə görə, Ağcabədi Suvarma Sistemləri İdarəsi Ağcabədi rayonunda 63 min hektar suvarılan torpaq sahəsinə xidmət edir: “Ötən il Ağcabədi rayonunun müxtəlif ərazilərində əkilən kənd təsərrüfatı bitkiləri öz axımı və nasosstansiyalar vasitəsi ilə suvarılıb. Bu il də növbəti suvarma mövsümünə hazırlıq məqsədilə Ağcabədi Suvarma Sistemləri İdarəsi gücləndirilmiş iş rejiminə keçib”.
Qeyd olunub ki, İdarənin balansında olan 52 ədəd nasos stansiyasının hər birinə baxış keçirilib və nasaz nasos aqreqatları təmir olunaraq yenidən istifadəyə verilib. Bundan başqa əhalinin içməli və suvarma suyuna olan təlabatını ödəyən subartezian quyuları da işlək vəziyyətdə saxlanılır.
D.Şərifovun sözlərinə görə, Ağcabədi rayonunda əkin aparılacaq olan sahələrin hər birinə suvarma suyunun itkisiz çatdırılması üçün ötən il ərzində torpaq məcralı kanallarda lildən təmizləmə işləri görülüb: “Bu işlər 2022-ci ildə də davam etdirilir. O cümlədən idarənin balansında olan kollektor drenaj şəbəkələrində də bu proses paralel olaraq aparılır. Drenaj şəbəkələrinin lildən təmizlənməsi isə uzun müddət əkin aparılmayan torpaqların münbitləşməsinə gətirib çıxarır”.
Qeyd edilb ki, Ağcabədi Suvarma Sistemləri İdarəsinin balansında 2261 kilometr suvarma kanalları, 1365 kilometr isə kollektor drenaj şəbəkəsi var: “Onu da bildirim ki, Ağcabədi rayonunda əsas su mənbəyi Yuxarı Qarabağ kanalı, Araz çayının qolu olan Xan qızı kanalı və subartezian quyularıdır”.
