Bayraqdar.info – “Azərbaycanın turizm potensialını tanıt” mövzusunda keçirilən müsabiqədə birinci yeri tutan qaliblərin mükafatalandırılması mərasimi keçirilib. Dövlət Turizm Agentliyi və Medianın İnkişafı Agentliyinin (MEDİA) KİV nümayəndələri arasında elan etdiyi bu müsabiqədə birinci yeri tutanlar üçün mükafatlandırma “Expo 2020 Dubai” beynəlxalq sərgisində turizm həftəsi çərçivəsində baş tutub.
Bu barədə bayraqdar.info-ya yanvarın 17-də Dövlət Turizm Agentliyindən məlumat verilib.
Bildirilib ki, mükafatlandırma mərasimində qaliblərə sertifikatlar Azərbaycan Turizm Bürosunun Baş icraçı direktoru Florian Zenqstşmid tərəfindən təqdim olunub. Qeyd edilib ki, müsabiqədə yazı kateqoriyası üzrə “Əsrlərdir saflığını qoruyan kənd – “Təbiət muzeyi”ndən reportaj” məqaləsi ilə Samirə Əli, TV süjeti kateqoriyası üzrə “Ağdam şəhəri işgüzar turizmin mərkəzi olacaq” süjeti ilə Çinarə Qambayeva və Elşad Məmmədov, foto kateqoriyası üzrə Anar Bayramlı I yeri tutaraq “EXPO 2020 Dubai” tədbirində Azərbaycan pavilyonunu ziyarət etmək üçün 3 günlük iştirak haqqı əldə ediblər.
O da bildirilib ki, “Expo 2020 Dubai” beynəlxalq sərgisində yanvarın 9-dan 15-dək təşkil olunan turizm həftəsi çərçivəsində Azərbaycan turizm şirkətləri tərəfindən Novruz ənənləri və elementləri, milli mətbəx nümunələri, müalicəvi Naftalan nefti, saxsı qablar və milli ornamentli zinət və dekorativ əşyaların hazırlanması nümayiş etdirilib, eləcə də ölkəmizin turizm imkanları təqdim olunub.
