Son yeniləmə: 16 Yanvar 2022 18:19
Elxan ŞÜKÜRLÜ
Çətin günündə sənin yanında duran, uğurunda, yüksəlişində rolu, zəhməti olan kəsin əziyyətini rahatlığa çıxdıqdan sonra unutmağın dədə-babadan bircə adı var – nankorluq!
Elmi ədəbiyyatda nankorluq həm də əsil-nəcabətsizliyin, köksüzlüyün və zatıqırıqlığın ifadəsi sayılır.
Elə həyat da dəfələrlə sübut edib ki, digərləriylə müqayisədə əsil-nəcabətsizlər, kökü olmayanlar nankorluğa, nankorlarsa xəyanətə daha çox meylli olurlar!
Bu, siyasətdə, idarəçilikdə və dövlətlərarası münasibətlərdə də belədir – özünə hörmət edən siyasətçi, rəhbər və ya dövlət, gərək ona edilmiş yaxşılığı, mərd davranışı, uğurunda rolu olanı heç vaxt unutmasın, yaxşılığı itirməsin!
Ancaq çox təəssüf ki, bizdə siyasətə makiavellizm prinsiplərindən yanaşanlar üçün nankorluq “siyasi çeviklik” nümunəsi sayılaraq təbliğ və təqdir edilməkdə, bir çox siyasət və media adamlarımızın isə həyat kredosuna çevrilməkdədir!
Biz bunun konkret nümunəsini özünü “demokratiyanın müdafiəçiləri” sayan Qərbpərəst siyasətçilərimizin və tərəfdarlarının sosial şəbəkələrdə Türkiye Cümhurbaşqanı Recep Tayyip Erdoğana münasibətdə ifadə etdikləri mövqelərdə daha yaxşı müşahidə edə, görə bilirik: 44 günlük Qarabağ savaşının hər anında mərdcə yanımızda duran və faktiki bu müharibənin zəfərlə yekunlaşmasında müstəsna rolu olan Türkiye Cümhurbaşqanı cənab R.T.Erdoğanı indi ölkəmizdəki bir sürü nankor, Qazaxıstan hadisələrini bəhanə edərək, “avtoritar”, “diktator” epitetləriylə ittihama başlayıblar!
Adamı yandıran həm də odur ki, erməninin qorxusundan 30 ildir dədə-babasının qəbrinin yerini belə unudan bəzi özünüitirmişlər onların görməli olduğu işi gördüyünə görə R.T.Erdoğana minnətdar olmaq əvəzinə qoşulublar Qərbin yedirib-bəslədiyi bu agentura şəbəkəsinə!
20 ildir rəhbərlik etdiyi bir partiyada bircə demokratik seçki keçirə bilməyənlərin, QHT-sində, qəzetində və saytında ən böyük avtoritar, oğru və əxlaqsız olanların əsas ittihamları da budur ki, Türkiyənin liderlik etdiyi Türk Dövlətləri Təşkilatının (TDT) rəhbərlərinin hamısı diktatordur, Rusiya Prezidenti Vladimir Putinin tapşırıqlarını yerinə yetirirlər, demokratik yolla seçilməyiblər və s.
Adamlar nankorcasına unudublar ki, Qarabağ savaşında bizimlə eyni səngərdə duran, düşmənimizi düşməni bilib onunla vuruşan o “diktator” adlandırdıqları R.T.Erdoğanın rəhbərlik etdiyi Türkiye oldu, ABŞ və Avropa Birliyi, “demokratik” seçilmiş Cozef Bayden və Emmanuel Makron yox!
2023-cü ildə Türkiyedə keçiriləcək prezident seçkiləri təkcə Türkiyenin yox, o cümlədən Azərbaycanın da taleyinə təsir göstərəcək ən mühüm hadisə olacaq. Kimlər Azərbaycanın uğurunu istəyirsə, əminəm ki, birmənalı olaraq R.T.Erdoğanı dəstəkləyəcəklər; kimlər Azərbaycana qarşıdırsa, onlar da R.T.Erdoğanın qarşısında yer alacaqlar!
Dostu, düşməni ayırd etmənin növbəti “qırmızı xətt”i budur!
Gəlin, nankorların sırasında yer almayın! Hər kəsdən əvvəl Allah bunu bizə bağışlamaz!
Qeyd: Facebook-da dərc edilmiş bu qeydlər müəllifin icazəsilə yayımlanır.
