Bayraqdar.info – Son vaxtlar cəmiyyətdə müəllim-şagird münasibətləri və məktəblərlə bağlı bəzən xoşa gəlməyən müzakirələr baş alıb gedir. Çox təəssüfləndiricidir ki, bu müzakirələrdə məktəbin və müəllimin nüfuzu sanki bilərəkdən gözdən salınır, təhsil sektorunun zəiflədilməsinə çalışma cəhdləri sezilir. Belə bir durumda sözünü deməyi bacaran, məktəbin və müəllimin nüfuzunu qorumağa çalışan şəxslər və qurumlar da yox deyil. Bunlardan biri qısa adı AZETA (Azerbaijan English Teachers Association – Azərbaycan İngilis Dili Müəllimləri Birliyi) olan qurumdur ki, onun məsələylə bağlı sosial media paylaşımını oxucularımıza təqdim etmək istərdik. İrəli qaçaraq qeyd edək ki, Facebook-da yayımlanmış yazını AZETA-nın izni ilə dərc edirik.
Şagirdin haqqı olduğu kimi vəzifəsi də var
Rəqsanə MƏMMƏDOVA, AZETA-nın rəhbəri
İndi biriləri müəllimin, dolayısı ilə Azərbaycan təhsilinin qəsdinə durub. Əgər aidiyyəti qurumlar müəlliminə sahib çıxsa cəmiyyət onu baltalamaqdan əl çəkər. Təəssüf ki, müəlliminə sahib çıxan cəmiyyətdən müəlliminə xor baxan cəmiyyətə çevrilmişik. Hamı da düşünür ki, müəllimi alçaltmaqla özləri ucalacaq, başları göyə ərəcək. Amma düşünmürlər ki, elə ən böyük pisliyi özlərinə edirlər.
Valideyn düşünmür ki, müəllimi pisləməklə təhsili övladının gözündən salır. Müəllim dəyişsə də, valideyn təhsili övladının gözündən saldığı üçün o övlad heç bir müəllimin dərsini oxumayacaq, heç bir müəllimə hörmət etməyəcək, təhsilə ikrah hissi ilə yanaşacaq və olan da müəllimdən çox o valideynin öz övladına olacaq.
Valideyn övladına demir ki, sənin hüququnla yanaşı vəzifən də var; məktəbdə necə davranırsan ki, sənin başına bunlar gəlir?
Bəli, heç kimin bir başqasının övladına fiziki təzyiq etmə, əl qaldırma haqqı yoxdur, ola da bilməz. Amma heç kimin övladının da təhsilverənlərə qarşı ədəbsizlik etmə, digər təhsilalanların hüququnu pozma haqqı yoxdur.
Şagirdin haqqı olduğu kimi təhsilverənlərin də haqqı var. Şagirdin haqqı olduğu kimi vəzifəsi də var. Vəzifəsi tələb olunmayan şagird müəllimə qarşı hər cür ədəbsizlik göstərəcək. Yetər bu qədər.
Müəlliminə sahib çıx, Azərbaycan xalqı. Yoxsa bir gün yox olacaqsan.
Hə, bir də unutma ki, bəyənmədiyin Azərbaycan müəllimi sənə, sənin övladına xaricdə təhsil almaq üçün əsas bilik və bacarıqları aşılayır. O Azərbaycan müəllimi ki, heç bir xarici universitetdə təhsil almayıb, xaricdə təhsil alma imkanlarına da maddi baxımdan sahib deyil. O Azərbaycan müəllimi ki, yeri gələndə öz övladından vaz keçir, ona ayıracaq vaxtı olmur ki, sənin övladın müvəffəqiyyət qazansın. Və ADAM olsun.
Mənə 1 hərf öyrədənə 40 il köləlik edərəm (Hz Əli). Öyrədəninə bu cür münasibətinə görə Hz Əli 14 əsrdir başımızın tacıdır. Dünya durduqca da bu belə davam edəcək.
Bu gün cəmiyyətin müəlliminə verdiyi dəyər elə onun öz dəyəridir. Müəllimdən əksilən heç bir şey olmayıb. Azərbaycan müəllimi bu gün də öz fədakarlığını, zəhmətkeşliyini, cəfakeşliyini qoruyub saxlaya bilib. Müəllim bu gün də dəyərlərə sahib çıxan müqəddəs peşənin daşıyıcısıdır.
Birini ləkələmək istəyənin o ləkəni atmazdan öncə öz əli ləkələnir. Öz əlini ləkələmədən bir başqasını ləkələyə bilməzsən. Müəllimi ləkələməyə çalışanların öz əlləri və vicdanları (əgər varsa!) ləkəlidir.
Biriləri yazdıqlarımızı sərt qəbul edəcək. Qoy olsun. Hər kəs susmaq məcburiyyətində deyil. Birilərinin də haqsızlığa “dur, yetər artıq” deməsi lazımdır.
