Bayraqdar.info – Son vaxtlar Azərbaycanın Kəlbəcər rayonu Ermənistan silahlı birləşmələri tərəfindən mütəmadi olaraq atəşə məruz qalır. Yanvarın 11-dən 12-nə keçən gecə isə səhərə qədər Ermənistan tərəfi sərhəd boyu yerləşən bölmələrindən Tovuz rayonu istiqamətində yerləşən yaşayış məntəqələrini və Azərbaycan Ordusunun mövqelərini atıcı silahlar və iriçaplı pulemyotlardan fasilələrlə atəşə tutub.
Onu da qeyd edək ki, yanvarın 11-də Qarabağ iqtisadi zonasında yerləşən Rusiya sülhməramlı qüvvələrinin komandanlığı dəyişdirilib. Yeni komandan general-mayor Andrey Volkov Azərbaycana gəlib.
Bildirək ki, yanvarın 12-də Azərbaycan müdafiə naziri general-polkovnik Zakir Həsənov Rusiya sülhməramlı qüvvələrinin yeni komandanı general-mayor Andrey Volkovu qəbul edib. Görüşdə Rusiya sülhməramlılarının müvəqqəti yerləşdirildiyi Qarabağ iqtisadi zonasındakı əməliyyat şəraiti müzakirə olunub.
Müdafiə naziri Rusiya sülhməramlılarının yeni komandanını qəbul edib
Ermənistan tərəfinin Kəlbəcər və Tovuz istiqamətində atəşkəsi pozması nədən qaynaqlanır? Nə üçün Ermənistan tərəfi 2020-ci ilin 10 noyabrında imzalanan üçtərəfli bəyanatın şərtlərinə əməl etmir?
Məsələ ilə bağlı Xəzər Müdafiə Tədqiqatları Mərkəzinin sədri, hərbi ekspert Ramil Məmmədli bayraqdar.info-ya açıqlama verib.
O bildirib: “Kəlbəcər və Tovuz istiqamətində baş verən hadisələri bir istiqamətdən, bir postdan digərinə açılan atəş kimi qiymətləndirməməliyik. Burada əsas məqam, əsas problem 2020-ci ilin 10 noyabr bəyanatından – hərbi əməliyyatların dayandırılmasından sonra tərəflərin üzərlərinə götürdükləri öhdəliklərin Ermənistan tərəfindən icra olunmamasıdır. Söhbət Ermənistan hərbi birləşmələrinin ərazilərdən çıxarılmamasndan gedir. Biz çox yaxşı bilirik ki, Ermənistan hərbi birləşmələri Qarabağ ərazisində yerləşir və bu birləşmələr sıravi birləşmələr deyil, ordu qruplarıdır. Mövcud vəziyyətin bu səviyyədə olması növbəti müharibə amilini yenidən gündəmə gətirir. Çünki biz ərazilərin işğaldan azad edilməsi haqqında danışırıqsa, bəyanat imzalanıbsa, orada yer alan şərtlər icra olunmalıdır. Əks təqdirdə bu bəyanat icra olunmamış sayılır. Belə çıxır ki, üzərinə götürdüyü öhdəliklər Rusiya tərəfindən icra olunmur. Bu amillər hamısı nəzərə alınmalıdır. Kəlbəcər isə bu prosesin bir qığılcımı və damlasıdır. Qeyd etdiyim məsələlər öz həllini tapmayana qədər belə hadisələrin baş verəcəyi istisna olunmur”.
