Son yeniləmə: 11 Yanvar 2022 15:24
Bayraqdar.info – Türk Dövlətləri Təşkilatına (TDT) üzvü və müşahidəçi ölkələrin xarici işlər nazirləri Qazaxıstanda baş verənləri qiymətləndirmək üçün növbədənkənar onlayn toplantı keçirib.
Anadolu Ajansının xəbərinə görə hadisələr zamanı həyatını itirənlərin xatirəsi bir dəqiqəlik sükutla yad edildikdən, həmçinin geniş fikir mübadiləsi aparıldıqdan sonra TDT bəyanat qəbul edib.
Bəyanatda Qazaxıstanda baş verən hadisələrdə həyatını itirənlərin yaxınlarına başsağlığı, yaralılara şəfa arzu edilib.
Qazaxıstan və bu ölkənin qardaş xalqına olan qətiyyətli dəstək və həmrəyliyin bir daha bəyan edildiyi sənəddə Qazaxıstanın öz regionunda və onun hüdudlarından kənarda sabitlik və təhlükəsizlik üçün həyati əhəmiyyət kəsb edən sabitliyinin əhəmiyyəti vurğulanıb.
Bəyanatda insanların həyatı üçün təhlükə yaradan, ictimai asayişi pozan və əmlaka ziyan vuran zorakılıq və dağıdıcı hərəkətlər pislənib. Eyni zamanda, Qazaxıstan hakimiyyətinin təcili olaraq ictimai asayişi və normal asayişi bərpa etmək imkanlarına inam vurğulanıb.
Beynəlxalq hüququn əsas norma və prinsiplərinin qorunmasının vacibliyi vurğulanan bəyanatda Qazaxıstan administrasiyasına ölkədə konstitusiya quruluşunu pozmağa yönəlmiş terrorçulara, radikallara, ekstremistlərə və cinayətkarlara qarşı aparılan antiterror əməliyyatlarında dəstək ifadə edilib.
“(TDT) mövcud böhranın aradan qaldırılmasında Qazaxıstan hökumətinə və xalqına lazımi dəstəyi göstərməyə hazır olduğunu bir daha bəyan edir”, -deyə, bəyanatda bildirilib.
Bəyanatda Təşkilat hazırki böhrandan çıxmaq üçün lazım gələrsə Qazaxıstan xalqını və hökumətini dəstəkləməyə hazır olduğunu bir daha təsdiqləyib. Habelə Qazaxıstan Prezidenti Qasım-Jomart Toqayevin qardaş Qazaxıstan xalqının güzəranının və rifahının daha da yüksəlişinə yönəlmiş islahat gündəliyi dəstəklənib.
