Son yeniləmə: 11 Yanvar 2022 18:51
Bayraqdar.info – CV yarat platforması vasitəsilə 3503 nəfər CV tərtib edib. Bu barədə Əmək və Əhalinin Sosial Müdafiəsi Nazirliyindən məlumat verilib.
Nazirlikdən bayraqdar.info-ya yanvarın 11-də verilən məlumatda qeyd edilib ki, ƏƏSMN-in tabeliyində Dövlət Məşğulluq Agentliyi tərəfindən CV hazırlamaqda çətinlik çəkən vətəndaşlara dəstək olmaq məqsədilə yaradılan CV yarat platformasından istifadə edənlərin sayı artır. Belə ki, ümumilikdə istifadəyə verildiyi 2 ay ərzində platformada 5206 vətəndaş qeydiyyatdan keçib.
Platformadan istifadə bütün hədəf qrupları üçün nəzərdə tutulub. İstifadəçilər portalda qeydiyyatdan keçərək, anket formasında şəxsi məlumatları, təhsil barədə məlumatları, iş təcrübəsini və peşəkar CV üçün önəmli digər məlumatları dolduraraq CV-ni PDF formatında əldə edə bilirlər.
Anket formasının hər addımında CV-ni maksimum cəlbedici etmək, istifadəçinin bilik, bacarıq və təcrübəsini, peşəkar həyatında olan uğurları və güclü tərəflərini düzgün nümayiş etdirmək üçün məsləhətlər verilir.
