Son yeniləmə: 15 May 2022
Adana şəhərinin qurtuluşunun 100 illiyi ilə əlaqədar Azərbaycan qaziləri üçün helikopterlə hava turu təşkil edilib
Bayraqdar.info – Xəbər verdiyimiz kimi Türkiye Muharip Gaziler Derneyinin dəvəti ilə Vətən müharibəsi qazilərinin bir qrupu qardaş ölkədə səfərdədir. Gənclər və İdman Nazirliyinin dəstəyi, “Tərxis Olunmuş Hərbçilərin Gəncləri Maarifləndirmə” İctimai Birliyinin təşkilatcılığı ilə həyata keçirilən səfər çərçivəsində qazilər Adananın düşmən işğalından qurtuluşunun 100 illiyi münasibətilə keçirilən tədbirlərdə iştirak ediblər.
Bu barədə bayraqdar.info-ya özəl olaraq “Tərxis Olunmuş Hərbçilərin Gəncləri Maarifləndirmə” İctimai Birliyinin sədri Emin Həsənli məlumat verib.
“Yanvarın 5-də Adana şəhərinin qurtuluşunun 100 illiyi münasibəti ilə yürüş keçirildi. Yürüşdə ön cərgədə Türkiyə və Azərbaycan qaziləri iki qardaş ölkənin bayraqları ilə addımladılar”, – deyə, o, bildirib.
E.Həsənlinin sözlərinə görə, Türkiyə Daxili İşlər Nazirliyi Daxili Qoşunlar Komandanlığı Azərbaycan qazilərinə böyük bir jest edib: “Belə ki, komandanlıq Adana şəhərinin qurtuluşunun 100 illiyi ilə əlaqədar Azərbaycan qaziləri üçün helikopterlə hava turu təşkil etdi. Bu hava turu zamanı qazilərin olduğu helikopter Adananın və Mersinin üzərində uçuşlar etdi”.
E.Həsənli ümumiyyətlə səfər proqramının ən yüksək səviyyədə təşkil olunduğunu da bildirib: “Bu günə kimi biz çox geniş və əhatəli, iki ölkənin qardaşlıq ruhuna uyğun proqramlarla qarşılandıq. Qarşıda da yenə maraqlı proqramlar bizi gözləyir. Bu səfər zamanı keçrilən görüşlərdə də dəfələrlə vurğulandığı kimi Türkiyə-Azərbaycan qardaşlığı əbədidir. Biz bir millət, iki dövlətik”.
