Bayraqdar.info – “İraq Türkmən Cəbhəsi (İTC) İraqda bütün tərəfləri əhatə edəcək yeni bir hökumətin qurulacağına ümid edir”.
Türkmeneli TV məlumat verir ki, bunu İTC-nin prezidenti Həsən Turan deyib. O, bildirib ki, türkmənlər İraqda yeni hökumətin qurulmasına ümid edirlər. H.Turan türkmənlərin yeni hökumətin tərkibində iştirak edəcəyinə ümid etdiyini də bildirib.
Hökumətin qurulması prosesində fəal iştirak etmək üçün Bağdadda mühüm görüşlər keçirdiklərini bildirən H.Turan daha sonra deyib: “Birləşmiş İraq Türkmənləri Siyahısı olaraq son bir ayda Bağdadda demək olar ki, bütün siyasi partiyalarla görüşdük. Türkmənlər başda olmaqla bütün tərəflərin yer alacağı bir hökumətin qurulmasından yana olduğumuzu koalisiya liderlərinə çatdırdıq. Türkmənlərin olmadığı bir hökumətin yarımçıq olacağını bir daha vurğuladıq”.
Onun sözlərinə görə, görüşlər zamanı bütün tərəflərə Kərkükün və türkmənlərin çoxluq təşkil etdiyi bölgələrin təhlükəsizliyinin İraq federal hökumət qüvvələri tərəfindən təmin olunmasının davam etdirilməsinin vacibliyini çatdırıblar. H.Turan, bu mövzuda müsbət reaksiyalar aldıqlarını bildirib.
