Son yeniləmə: 1 Yanvar 2022 14:59
Bayraqdar.info – Nyu York şəhərinin Bruklin bölgəsində Dünya Azərbaycanlılarının Həmrəyliyi Günü və yeni il münasibətilə bayram tədbiri keçirilib. Tədbir Nyu York Azərbaycan Mədəniyyət Mərkəzi, Amerika Azərbaycan Qadın Cəmiyyəti və Amerika Azərbaycan Mədəniyyət Mərkəzinin birgə təşkilatçılığı ilə baş tutub.
Bu barədə bayraqdar.info-ya yanvarın 1-də Azərbaycan Amerika Qadın Cəmiyyətinin yaradıcısı və rəhbəri, Amerika Azərbaycanlıları Koordinasiya Şurasının İdarə heyətinin üzvü Minəvvər Vahabova məlumat verib. Bildirilib ki, tədbiri giriş sözü və təbriklərlə cəmiyyətlərin rəhbərləri Telman Cəlil, Minəvvər Vahabova və Zöhrə Şərifi açıblar.
M.Vahabovanın sözlərinə görə, tədbirdə 100-dən artıq həmvətənimiz, o cümlədən dəyərli qonaqlar iştirak edib: “Turkiyənin vitse konsulu Orhan Selçuk Sarı, Türk Dərnəkləri Federasiyasının sabiq və yeni başçıları Atilla Pak və Zarifşa Muratoğlu, baş katib Gülay Kösəoğlu, Dağ Yəhudiləri icmasının lideri Yakov Abramov və digər rəsmi qonaqlar tədbirdə çıxış edərək təbriklərini çatdırdılar. Həmçinin Pakistan icmasının nümayəndəsi Vaqil Əhməd, BMT yanında Azərbaycan Respublikasının daimi nümayəndəliyinin birinci katibi Cavid İsmayılov, Diasporla İş Üzrə Dövlət Komitəsinin Amerika ölkələri, İsrail və Birləşmiş Krallıq üzrə şöbə müdiri Səlhət Abbasova və Nyu York şəhərinin meri Erik Adams tədbirdə işrirak edə bilməsələr də öz təbriklərini video və məktubla tədbir iştirakçılarına ünvanlamışdılar”.
Çıxış və təbriklərdən sonra 2021-ci ildə Azərbaycan naminə görülən fəaliyyətdə fərqlənən 32 gəncə Fəxri Fərmanlar verilib.
Həmçinin 44 günlük müharibə dövründə Azərbaycana dayaq olan, Nyu Yorkdakı tədbirlərdə yaxımdan içtirka edən Türkiyə, Pakistan və İsrailin təmsilçilərinə təşəkkürnamələr təqdim olunub.
M.Vahabova bildirib ki, Nyu York Mədəniyyət Mərkəzinin nəzdində fəaliyyət göstərən “Turan” ansamblının debütü də gecəyə xüsusi rəng qatıb: “Həmçinin gənc müğənni Samir Quluzadənin mahnıları hamını heyran etdi. Maraqlı oyunlar, dadlı təamlar,musiqi və rəqslərlə davam edən gecə iştirakçılarda xoş əhval-ruhiyyə yaratdı”.
