Bayraqdar.info – Pakistan dövləti Ermənistanı dövlət kimi tanımaq və onunla əlaqələr qurmaq fikrində deyil. Bu sözləri Pakistanın xarici işlər naziri Şah Mahmud Qureşi deyib.
Pakistan-Azərbaycan Məzunları Assosiasiyasının qurucu-prezidenti Qayser Navabın bayraqdar.info-ya verdiyi xəbərdə belə deyilir.
Q.Navab bildirib o, dekabrın 30-da Pakistan parlamentində Ş.M.Qureşi ilə görüşüb. Görüşdə regional və qlobal müstəvilərdə gənclər diplomatiyası müzakirə edilib.
Söhbət əsnasında Q.Navab Ermənistan Prezidenti Armen Sarkisyanın bu yaxınlarda Pakistan mediasına verdiyi müsahibədə ikitərəfli münasibətlər qurma istəyinə də toxunub. Buna münasibət bildirən Ş.M.Qureşi deyib ki, Pakistan hər cür təcavüzün əleyhinədir. Eyni zamanda bu dövlət dinc yanaşı yaşamağın tərəfdarıdır. “Bu, Pakistan xarici siyasətinin əsas prinsipidir”, – deyə nazir bildirib.
Nazir onu da əlavə edib ki, Ermənistanın Azərbaycana aid Qarabağa təcavüzü ədalətsizlikdir və bu baxımdan Ermənistanı tanımaqla bağlı heç bir təklif və təşəbbüs yoxdur: “Pakistan qardaş Azərbaycanla bir sırada durur”.
Əlavə edək ki, Pakistan-Azərbaycan Məzunları Assosiasiyası həmişə Azərbaycanın haqq səsini dəstəkləyir, Ermənistanın təcavüzünü qlobal səviyyədə ictimailəşdirmək üçün durmadan çalışır.
Onu da qeyd edək ki, Ermənistan Prezidenti müsahibəsində Pakistana qarşı getmədiklərini vurğulayıb: “Pakistan inkar edilə biləcək ölkə deyil və biz bu ölkəylə savaşacaq halda deyilik. Bu, tamamilə nonsensdir!”
