Son yeniləmə: 30 Dekabr 2021 09:32
Bayraqdar.info – Azərbaycan Ordusunun Baş Qərargah rəisi Kəlbəcər rayonunda yerləşən hərbi hissələrdə olub.
Bu barədə bayraqdar.info-ya dekabrın 30-da Müdafiə Nazirliyindən məlumat verilib. Müdafiə nazirinin tapşırığına əsasən nazirin birinci müavini – Azərbaycan Ordusunun Baş Qərargah rəisi general-polkovnik Kərim Vəliyev Kəlbəcər rayonunda dislokasiya olunan hərbi hissələrdə olub.
Azərbaycan Ordusunun Baş Qərargah rəisi birləşmənin qərargah heyəti və hərbi qulluqçular üçün yaradılan şəraitlə tanış olub, yeni istifadəyə verilmiş yeməkxanaya baxış keçirib.
“Baş Qərargah rəisi Ermənistanla dövlət sərhədində 3 min 400 metrədək hündürlükdə xidmət edən hərbi qulluqçuların sosial-məişət şəraiti ilə maraqlanıb, komanda-müşahidə məntəqəsindən qarşı tərəfin fəaliyyətini izləyərək döyüş növbətçiliyinin təşkili və aparılması ilə bağlı əlavə göstərişlər verib.
“Hərbi qulluqçularla birlikdə nahar edən Baş Qərargah rəisi onların qayğıları ilə maraqlanıb, qarşıdan gələn Dünya Azərbaycanlılarının Həmrəyliyi Günü və Yeni il bayramı münasibətilə Nazirliyin rəhbərliyi adından təbrik edib.
“Sonda xidmətdə fərqlənən hərbi qulluqçulara müdafiə naziri adından qiymətli hədiyyələr təqdim olunub”, – deyə məlumatda bildirilir.
