Bayraqdar.info – Kənd Təsərrüfatı Nazirliyi və “Bir Pəncərə” İxraca Dəstək Mərkəzinin təşkilatçılığı ilə fermerlərin ixraca təşviqi barədə onlayn seminar keçirilib.
Nazirliyin İctimaiyyətlə əlaqələr və informasiya təminatı şöbəsindən dekabrın 28-də bayraqdar.info-ya verilən məlumatda deyilir ki, tədbirin təşkilində əsas məqsəd fermerləri və yerli qida istehsalçılarını xarici bazarların standartları ilə tanış etməkdir. Həmçinin, fermerlər hədəf bazarın təyin olunması, məhsulların tanıdılması üçün platformaların seçilməsi, ixrac prosesi zamanı beynəlxalq sertifikatların və digər sənədlərin hazırlanması, potensial alıcı bazasının yaradılması və yeni müştərilərin tapılması istiqamətlərində məlumatlandılıblar.
“Seminarda KTN-nin tabeliyindəki “Aqrar Tədarük və Təchizat” ASC-nin, “Bir Pəncərə” İxraca Dəstək Mərkəzinin, Aqrar Tədqiqatlar Mərkəzinin, AzExport.az saytının, Azərbaycanda İxracın və İnvestisiyaların Təşviqi Fondunun (AZPROMO), Qida Təhlükəsizliyi Agentliyinin nümayəndələri və digər qonaqlar iştirak ediblər.
“Natiqlər ixrac prosesi ilə bağlı fermerləri maraqlandıran mövzular barədə çıxış edib, həmçinin fermerlər tərəfindən verilən sualları cavablandırıblar”, – deyə məlumatda bildirilir.
