Son yeniləmə: 25 Dekabr 2021 13:59
Bayraqdar.info – Meksikanın nüfuzlu KİV-lərindən olan “Contra Replica” qəzetlində səfir Məmməd Talıbovun müsahibəsi dərc olunub.
Bu barədə bayraqdar.info-ya dekabrın 25-də Azərbaycanın Meksikadakı səfirliyindən məlumat verilib.
Bildirilib ki, müsahibə Ermənistanın keçmiş münaqişə ərzində törətdiyi müharibə cinayətləri, hazırda Cənubi Qafqazda gərginliyin artmasına səbəb olan təxribatçı addımları, regionun yeni reallıqları, burada Azərbaycan tərəfindən görülən işlər və bölgədə davamlı sülhün əsas şərtlərindən bəhs edilib.
“Yazıda ilk olaraq, Ermənistanın 30 illik işğal dövründə törətdiyi müharibə və insanlıq əleyhinə cinayətləri, habelə 44 günlük müharibə zamanı münaqişə zonasından kənarda yerləşən şəhərləri ballistik raket hücumlarına məruz qoyaraq mülki soydaşlarımız arasında çoxsaylı tələfata səbəb olması, eləcə də işğaldan azad olunmuş ərazilərdə müşahidə olunan erməni vandalizmi, burada aparılmış kütləvi minalama və törətdiyi fəsadlar haqda məlumat verilir.
Sonra bölgədə periodik olaraq özünü biruzə verən gərginliyin səbəbinin Ermənistanın hərbi-siyasi rəhbərliyinin atdığı addımlar, bu xüsusda bu ölkənin keçmiş müdafiə nazirinin Rusiya sülhməramlı qüvvələrinin müvəqqəti yerləşdirildiyi Azərbaycan ərazilərinə qanunsuz səfəri, Ermənistan silahlı qüvvələrinin 60-a yaxın hərbi qulluqçusunun Azərbaycan ordusunun Laçın ərazisindəki mövqelərinə aparan yolda cəmləşməsi, Laçın və Kəlbəcərdəki mövqelərimizin intensiv atəşə tutulması kimi hallar olduğu bildirilir.
Buna baxmayaraq, Azərbaycanın üçtərəfli bəyanatlardan irəli gələn tələblərə sadiq qaldığı, hazırda bütün səylərini bölgənin yenidən qurulmasına, nəqliyyat yollarının və kommunikasiya xətlərinin bərpa edilməsinə və bölgənin hərtərəfli inkişafına yönəltdiyi vurğulanır”, – deyə məlumatda qeyd edilir.
Yazıda həmçinin, Ermənistan tərəfinin destruktiv ritorikasının başlıca elementlərindən olan “hərbi əsirlər” məsələsinə də fikir bildirilib. Səfir Azərbaycan tərəfindən həbs edilmiş erməni əsilli şəxslərin 10 noyabr 2020-ci il bəyanatından sonra Azərbaycan ərazisinə keçərək burada terror aktları törətməyə cəhd etdiklərini, bu səbəbdən onların hərbi əsir deyil, terrorçu olduqlarıvə hazırda Azərbaycanın aidiyyəti orqanları tərəfindən məsuliyyətə cəlb edildiklərini bildirib. Diplomat bununla belə,xoş niyyət göstəricisi olaraq sözügedən şəxslərdən cinayətkar əməllərdə birbaşa olaraq iştirak etməmiş olanlarının azadlığa buraxıldığını deyib.
Sonda Azərbaycanın sərhədlərin demarkasiya və delimitasiyası işinin başlanması və yekun sülh müqaviləsinin işlənib hazırlanmasına dair Ermənistana dəfələrlə müracitələr ünvanlasa dabu günədək heç bir müsbət cavab almadığı deyilir. Bölgədə davamlı sülhə nail olunması üçün Ermənistanın qonşularına qarşı ərazi iddilalarından əl çəkməli, Azərbaycanın ərazi bütövlüyünü tanımalı, xalqını barışığa hazırlamalı və region ölkələri ilə mehriban qonşuluq şəraitində yaşamağı öyrənməli olduğu bildirilir.
