Bayraqdar.info – Prezident İlham Əliyev dekabrın 23-də Bosniya və Herseqovina Nazirlər Şurası sədrinin müavini və xarici işlər naziri Bisera Turkoviçi qəbul edib.
Məlumatı Prezidentin Mətbuat xidməti yayıb.
Qonaq Bosniya və Herseqovinanın Rəyasət Heyətinin sədri Şefik Caferoviçin salamlarını dövlət başçısına çatdırıb.
Prezident İ.Əliyev Bosniya və Herseqovinanın Rəyasət Heyətinin sədrinin salamlarına görə minnətdarlığını bildirib, onun da salamlarını Şefik Caferoviçə çatdırmağı xahiş edib.
“Dövlət başçısı bu yaxınlarda Bosniya və Herseqovinanın Rəyasət Heyətinin sədri Şefik Caferoviçlə görüşünü məmnunluqla xatırlayıb. Ölkə başçısı Bosniya və Herseqovinanın Azərbaycanın ərazi bütövlüyünə və Vətən müharibəsi dövründə ölkəmizə verdiyi dəstəyi bir daha yüksək qiymətləndirib, bunu dostluq və tərəfdaşlıq əlaqələrinin mühüm göstəricisi kimi dəyərləndirib. Prezident İ.Əliyev öz növbəsində Azərbaycanın da Bosniya və Herseqovinanı dəstəklədiyini vurğulayıb. Dövlət başçısı azad olunmuş ərazilərdə ermənilər tərəfindən 30 ilə yaxın davam edən işğal dövründə şəhərlərin, kəndlərin, tarixi və dini abidələrin darmadağın edildiyini bildirərək indi ölkənin həmin ərazilərdə həyata keçirdiyi geniş yenidənqurma və bərpa işlərindən danışıb.
“Bosniya və Herseqovina Nazirlər Şurası sədrinin müavini və xarici işlər naziri Bisera Turkoviç Azərbaycanın əldə etdiyi böyük nailiyyətlər münasibətilə dövlət başçısını təbrik edib və inkişaf proseslərinin onda dərin təəssürat doğurduğunu qeyd edib”, – deyə məlumatda bildirilir.
