Son yeniləmə: 16 Dekabr 2021 10:07
Bayraqdar.info – Payızlıq əkin mövsümü ilə əlaqədar sentyabr ayından etibarən rayon mərkəzlərindən uzaq məsafədə yerləşən kənd və qəsəbələrdə mineral gübrələrin səyyar satışı xidmətinə başlanılıb. Səyyar satış “Aqroservis” Açıq Səhmdar Cəmiyyəti tərəfindən həyata keçirilir. ASC-nin anbarlarından kənd təsərrüfatı məhsulları istehsalçılarının tələbatına uyğun olaraq mineral gübrələrlə tam təchiz edilmiş, fermerlərin sərfəli qiymətlərlə gübrələri əldə etməsinə şərait yaradılıb.
Kənd Təsərrüfatı Nazirliyindən bayraqdar.info-ya verilən məlumatda bildirilir ki, payız əkinləri üçün bütün regionları əhatə edən səyyar satış zamanı 300-ə yaxın kənd və qəsəbə üzrə səyyar xidmət təşkil edilib. Bu səyyar xidmətlərdən 2 minə yaxın fermer yararlanıb. Səyyar satış zamanı fermerlər ammofos, kükürdlü ammofos, ammonium-nitrat, ammonium-sulfat, kalium-sulfat, karbamid və nitroammofoska kimi mineral gübrələri əldə ediblər.
Səyyar satışın həyata keçirilməsində əsas məqsəd gübrələrin alışı zamanı vətəndaşların sərf etdikləri zaman, məsafə itkisinin və əlavə məsrəflərin qarşısının alınmasıdır. Vətəndaşların mineral gübrələri asanlıqla əldə etməsi əkinə cəlb edilən bütün torpaqlarda gübrələrdən istifadə edilməsinə şərait yaradır ki, bu da məhsuldarlığın artmasına öz müsbət təsirini göstərir.
“Fermerlər əkin mövsümündə mineral gübrələrin alışında sərf etdikləri məsrəfə qənaət etmək üçün səyyar satış xidmətlərini Səhmdar Cəmiyyətin 1659 satış mərkəzinə müraciət edərək də sifariş ediblər. Sifarişlərə əsasən səyyar xidmətlər kənd və qəsəbələrdə təşkil edilmiş, bir sıra hallarda isə birbaşa fermerlərin ünvanına çatdırılıb.
“Səyyar satış zamanı fermerlər yeni subsidiya qaydalarına əsasən heç bir əlavə sənəd təqdim etmədən, yalnız “Fermer kartı”nı təqdim etməklə mineral gübrə əldə edirlər. Yeni qaydalara əsasən mineral gübrənin dəyərinin 100 faizi də fermer kartından ödənilir, fermer əlavə ödəniş etmir.
“Növbəti aylarda “Aqroservis” ASC tərəfindən mövsümə uyğun yemləmə gübrələrinin də səyyar xidmətlərlə satışı təşkil ediləcək”, – deyə KTN-in məlumatında qeyd edilib.
