Bayraqdar.info – Nəzərdə tutulduğu kimi, dekabrın 14-də Belçikanın paytaxtı Brüsseldə Azərbaycan Prezidenti İlham Əliyevin Ermənistan Baş naziri Nikol Paşinyanla görüşü keçirilib. Görüşü Avropa Birliyi Şurasının Prezidenti Şarl Mişel təşkil edib. Sonuncunun da qatıldığı üçtərəfli görüş gecə gec saatlaradək davam edib.
Üçtərəfli görüşdən sonra Azərbaycan Prezidenti ilə Ermənistan Baş nazirinin ikitərəfli görüşü də keçirilib. Hələlik ayrıntılarını əldə edə bilmədiyimiz bu görüşlə bağlı gün ərzində bilgi verməyə çalışacağıq.
AB Şurası Prezindentindən bəyanat
Bu arada onu da qeyd edək ki, Ş.Mişel üçtərəfli görüşdən sonra bəyanatla çıxış edib. Media qurumlarının sabaha doğru yaydığı bəyanat mətnində bir sıra mühüm məqamlara toxunulub.
LIVE NOW – Statement following the Trilateral Meeting with @presidentaz Ilham Aliyev and Prime Minister @NikolPashinyan https://t.co/IqCD2NINGM
— Charles Michel (@eucopresident) December 14, 2021
İTV-nin öz Telegram kanalında yaydığı qeyri-rəsmi tərcümədə deyilir: “Bəyanatda AB Şurasının Prezidenti tərəfindən Ermənistan ilə Azərbaycan arasındakı münaqişənin aradan qaldırılmasına, Güney Qafqazda sülhün bərqərar olunması üçün Azərbaycanla Ermənistan arasında hərtərəfli sülh müqaviləsinin imzalanmasına çağırış edilib.
“Ş.Mişel bildirib ki, 2020-ci il 10 noyabr, 2021-ci il 11 yanvar və 26 noyabr (Soçi) görüşləri və bəyanatlarından irəli gələn öhdəliklər yerinə yetirilməlidir. Bəyanatda ilk dəfə olaraq AB-nin gündəliyinə itkin düşmüş şəxslər mövzusu daxil edilib, onların taleyinə aydınlıq gətirilməsinin zəruriliyi qeyd olunub.
“AB Şurası Prezidentinin bəyanatında, həmçinin minatəmizləmə səylərinə, münaqişədən əziyyət çəkmiş insanlara, xüsusilə yenidənqurma fəaliyyətlərinə dəstək ifadə edilib. Habelə sərhədlərin demarkasiyası və delimitasiyası məsələsində AB tərəfindən məşvərətçi statusda dəstək verilə biləcəyi vurğulanıb.
“Diqqətə çatdırılıb ki, AB Güney Qafqaz regionunda iqtisadi əməkdaşlığın inkişafını dəstəkləyir. Eyni zamanda, birgə iqtisadi əməkdaşlıq platformasının yaradılması təklifi irəli sürülür.
“Ş.Mişel regionda kommunikasiya infrastrukturunun yaradılmasına, ölkələr arasında əlaqəni təmin edən xətlərin açılmasına və inkişaf etdirilməsinə AB-nin dəstəyini ifadə edib. Qurumun hətta iqtisadi və investisiya resursları vasitəsilə bu layihələri dəstəkləyəcəyi də vurğulanıb.
“Bəyanatda dəmir yolu xəttinin çəkilməsi məsələsinə xüsusi toxunulub. Həmçinin dəmir yollarında gömrük və sərhəd nəzarətinin qarşılıqlılıq prinsipi əsasında təşkil olunacağı diqqətə çatdırılıb”.
Göründüyü kimi, AB Şurası Prezidentinin bəyanatı məhz Azərbaycan tərəfinin müharibədən sonra təkrar-təkrar dilə gətirdiyi məsələlərdə haqlı olduğunu göstərir. Bu isə, əlbəttə ki, Prezident İlham Əliyevin bu dəfə də üstün durumda olduğunun daha bir sübutudur.
Nikol Paşinyanın ilkin dəyərləndirməsi
“Biz dəmir yolunun yenidən işə salınması ilə bağlı Azərbaycan Prezidenti ilə razılaşmaları təsdiqlədik. Dəmir yolu beynəlxalq səviyyədə qəbul edilmiş sərhəd və gömrük qaydalarına uyğun olaraq dövlətlərin suverenliyi və hüququ altında qarşılıqlılıq prinsipləri əsasında işləyəcək. Ermənistan dəmir yolu vasitəsilə İrana və Rusiyaya çıxış əldə edəcək. Biz həm də əlaqələrin davam etdirilməsi ilə bağlı razılaşdıq.” Bu sözlər Ermənistan Baş nazirinin qeyd olunan görüşdən sonra öz sosial şəbəkə hesabında etdiyi paylaşımdandır.
[…] Avropa Birliyi Şurası Prezidentinin üçtərəfli görüşlə bağlı bəyanatı – VİDEO […]