Son yeniləmə: 10 Dekabr 2021 10:30
Bayraqdar.info – “STEAM – rəqəmsal bacarıqları, XXI əsr kompetensiyalarını özündə birləşdirən layihədir. Yüz mindən çox şagirdi birləşdirən bu layihədə ölkənin müxtəlif bölgələrindən 1000-dən artıq şagird 350-dən çox layihə ilə festivala qatılıb”. Bu sözləri təhsil naziri Emin Əmrullayev “STEAM Azərbaycan Festivalı 2021”in açılış mərasimində deyib. Qeyd edək ki, dekabrın 9-da Bakı Ekspo Mərkəzində Təhsil Nazirliyinin dəstəyi ilə STEAM Azərbaycan layihəsi çərçivəsində Festivalın açılışı olub.
Bu barədə Təhsil Nazirliyindən bayraqdar.info-ya bildirilib.
Mərasimdə təhsil naziri Emin Əmrullayev, millət vəkilləri, ictimaiyyət nümayəndələri, Türkiyə və İsraildən olan qonaqlar iştirak edib.
6-11-ci sinif şagirdləri üçün ilk dəfə təşkil edilən festivalın keçirilməsində məqsəd müxtəlif ideyaları ilə fərqlənən istedadlı və yaradıcı şagirdlərin aşkar olunması, təhsilalanlar arasında yeni əməkdaşlıq və ünsiyyət imkanlarının inkişaf etdirilməsidir.
Tədbirdə layihəsinin rəhbəri İqrar Nəzərov STEAM-ın 2019-2020-ci tədris ilindən həyata keçirildiyini qeyd edib. O bildirib ki, hazırda layihə 302 məktəbi, 1600 müəllimi əhatə edir. Layihə VI, VII, VIII siniflərdə həftədə 2 saat olmaqla il ərzində 68 saat keçirilir. Layihənin icra olunduğu məktəblərdən 189-u Bakı şəhərinin, 113-ü isə regionların payına düşür.
Daha sonra İsrailli startap və akselerasiya eksperti Tal Katran festivalın əhəmiyyətinə toxunub. O, iştirakçılara uğurlar arzulayıb.
Çıxışlardan sonra festival çərçivəsində nəzərdə tutulan və müxtəlif kateqoriyalar üzrə yarışlara başlanılıb. Yarışlar “STEAM Open (Makerthon)”, “Hackaton”, “Micro:bit”, “Lego Sumo senior”, “Lego Sumo junior”, “Line folower”, “3D Cad”, “Short movie”, “Edu dron”, “Humanoid robot” kateqoriyaları istiqamətində reallaşacaq. Əlavə olaraq, iştirakçılar Kvest texnologiyaları modulu üzrə “Escape Room”la tanış olacaq, oyunun aktiv iştirakçısına çevrilə bilmək imkanı qazanacaqlar.
Festivalda “Zəfər” Şəhid Ailələrinə Dəstək İctimai Birliyinin təşkilatçılığı ilə şəhid övladları da iştirak edib. Festival davam edir.
