Son yeniləmə: 10 Dekabr 2021 13:23
Bayraqdar.info – Azərbaycan Ordusunun mühəndis-istehkam bölmələri Türkiyənin hərbi istehkamçıları ilə birgə azad olunmuş ərazilərin minalardan və partlamamış döyüş sursatlarından təmizlənməsi işlərini davam etdirir.
Xəbər bayraqdar.info-ya dekabrın 10-da Müdafiə Nazirliyindən verilib.
Nəqliyyat vasitələrinin təhlükəsiz hərəkətini təmin etmək məqsədilə yollar minalardan və qar örtüyündən təmizlənir, həmçinin dağlıq və çətin keçilən ərazilərdə yerləşən bölmələrimizin mövqelərinə yeni təminat yolları çəkilir.
“Azad olunmuş ərazilərdə mühəndis-istehkam bölmələrinin fəaliyyəti nəticəsində dekabrın 1-dən 10-dək 342 ədəd piyada və tank əleyhinə minanın aşkar olunaraq zərərsizləşdirilməsi ilə 96.7 hektar ərazi təmizlənib.
“Ümumilikdə azad olunmuş ərazilərdə bu günədək mühəndis qoşunları tərəfindən 17 min 202 mina və partlamamış döyüş sursatı aşkar olunaraq məhv edilib, 13 min 273 ha ərazi minalardan təmizlənib. Digər dövlət qurumları ilə qarşılıqlı əlaqədə 628 km yol çəkilib.
“Yaşayış məntəqələrinin, əkin üçün yararlı olan ərazilərin minalardan və partlamamış döyüş sursatlarından təmizlənməsi işlərinə Ordunun mühəndis-istehkam bölmələrinin sərəncamına verilən Türkiyə Milli Müdafiə Nazirliyinin tabeliyindəki “MEMATT” (Mexanik Mina Təmizləmə Təchizatı) texnikası da cəlb edilib.
“Azad olunmuş ərazilərdə mühəndis təminatı üzrə tədbirlər davam etdirilir”, – deyə xəbərdə bildirilir.
