Bayraqdar.info – “Sosial şəbəkələrdə, elan saytlarında oyuncaq silah satışı var. Əksəriyyəti isə dəmir konstruksiyalıdır. Oyuncaq silah əşyaları ilə bağlı hansısa qadağa yoxdur. Ancaq bu oyuncaq əşyanı alıb onu ictimai yerlərdə, beldə, avtomobilin görünən yerində gəzdirilməsi və saxlanılması ilə bağlı polis orqanlarına vətəndaşlardan məlumatlar daxil olur”.
Bu sözləri DİN Mətbuat xidmətinin rəhbəri Elşad Hacıyev sosial şəbəkədəki hesabında yazıb.
Onun bildirdiyinə görə, məlumat yoxlanılıb araşdırıldıqdan sonra vətəndaşı dəvət edib onunla söhbət aparılarkən vətəndaş cavab verir ki, “oyuncaqdır, elə-belə gəzdirirəm”.
“Bu, “elə-belə” gəzdirmə əməlinin adı nədir? Cavab verməkdə aciz qalır. Təbii ki, bu, bizə məlumdur, onu niyə və nə səbəbə gəzdirir. Bu, özünü göstərməkdir? Bu özünü güclü təqdim etməkdir? Bu kiminsə diqqətini çəkməkdir?
“Həmin şəxslərin diqqətinə çatdırın ki, bu, hansısa ictimai təhlükəli əmələ rəvac verə, yaxud kiminsə qorxmasına, həyacanlanmasına, stress keçirməsinə səbəb ola bilər”, – deyə E.Hacıyev yazıb.
