Son yeniləmə: 7 Dekabr 2021 18:17
Bayraqdar.info – Dekabrın 7-də saat 16:00 radələrində Dövlət Sərhəd Xidmətinin Sərhəd Qoşunlarının “Göytəpə” sərhəd dəstəsinin Yardımlı rayonunun Daşkənd kəndi yaxınlığındakı ərazisində sərhəd naryadı tərəfindən 2 nəfər naməlum şəxsin dövlət sərhədini pozaraq ölkəyə gəlməyə cəhd etmələri aşkar olunub.
Bu barədə DSX-nın Mətbuat Mərkəzinin məlumatında bildirilir.
“Sərhəd zastavası “Silaha” komandası üzrə qaldırılaraq, naryad tərəfindən “Dayan” əmri verilərək sərhəd pozucuları təqib edilib və havaya xəbərdarlıq atəşi açılıb. Lakin sərhəd pozucuları əmrə tabe olmayıblar. Sərhəd pozucuları sərhəd naryadına qarşı odlu silahdan atəş açıb, əllərindəki 2 ədəd bağlamanı ataraq hadisə yerindən geriyə qaçmağa cəhd göstəriblər.
“Dövlət sərhədi haqqında” qanuna əsasən, sərhəd naryadı sərhəd pozucularına qarşı silah tətbiq ediblər. Onlardan biri zərərsizləşdirilib. Hazırda həmin sərhəd pozucusunun şəxsiyyətinin müəyyənləşdirilməsi üzrə tədbirlər görülür.
“Digər sərhəd pozucusunun axtarışı üzrə daxili işlər orqanları ilə birgə tədbirlər həyata keçirilir.
“Hadisə yerində aşkarlanmış 2 ədəd bağlamada 4 min 270 ədəd “Marlboro”, “Kent”, “More” markalı siqaret qutusunun olması müəyyən edilib.
“Hadisə barədə İran tərəfi məlumatlandırılıb. Dövlət Sərhəd Xidmətinin rəhbər vəzifəli zabitləri hadisə yerinə ezam olunublar”, – deyə məlumatda bidirilir.
