Son yeniləmə: 7 Dekabr 2021 19:25
Bayraqdar.info – Güləş üzrə Azərbaycan çempionatının açılış mərasimi keçirilib. Azərbaycan Güləş Federasiyasından əldə etdiyi xəbərdə bildirir ki, Bakı İdman Sarayındakı tədbirdə gənclər və idman nazirinin müavini Mariana Vasileva, Nazirliyin İdman şöbəsinin müdiri Fərid Mansurov və Azərbaycan Güləş Federasiyasının prezident əvəzi Namiq Əliyev iştirak edib.
“Əvvəlcə Vətən müharibəsi şəhidlərinin xatirəsi bir dəqiqəlik sükutla yad olunub. M.Vasileva yarış iştiraçılarını salamlayıb: “Bilmirdim ki, mənim danışmağım lazımdır. Amma hamını təbrik edirəm. Çünki bu yarış çox vacibdir. Pandemiyaya görə bizim turnirlərin çoxu baş tutmayıb. Sizi təbrik edirəm və uğurlar arzulayıram. Çox sağ olun”.
“N.Əliyev iki il müəyyən problemlər ucbatından çempionatı keçirə bilmədiklərini söyləyib: “Artıq bu il yarışı təşkil edirik. Azərbaycan çempionatı bizim üçün çox önəmlidir. Ağır olimpiada ilini geridə qoyuruq. Bizim idmançılar olimpiadada 3 medal qazanıblar. Ötən illərə baxanda nəticə bizi qane etmir. Amma olimpiada medalı tam fərqlidir. Pandemiya bir az səngiyir və idman öz həyatına qayıdır. Azərbaycan birinciliyini keçirmək də onun bariz nümunəsidir. Yarışda bizi maraqlı mübarizələr gözləyir. Növbəti Paris-2024 Yay Olimpiya Oyunlarına az qalıb. Çempionatın qalibləri bizi olimpiya təsnifat turnirlərində təmsil edəcəklər”.
“F.Mansurov da iştirakçıları salamlayıb və güləşçilərə uğurlar arzulayıb. Dövlət Himninin səslənməsindən sonra Azərbaycan çempionatı açıq elan olunub”, – deyə xəbərdə bildirilir.
