Son yeniləmə: 7 Dekabr 2021 16:21
Bayraqdar.info – Dekabrın 17-də Macarıstanın Budapeşt şəhərində növbəti “Bakının Birİncisi” Beynəlxalq İntellektual Festivalı keçiriləcək. Festivalda 50-dən çox qonağın iştirakı nəzərdə tutulub.
Bu barədə bayraqdar.info-ya dekabrın 7-də layihənin koordonatoru Nərmin Bəşirzadə məlumat verib.
Qeyd olunub ki, qonaqları çox dolğun proqram gözləyir: “Bu proqrama açılış mərasimi, 8 raund, həmçinin 60-a yaxın sualdan ibarət intellektual və əyləncəvi turnir, nəhayət Macarıstandakı Azərbaycan Evində baş tutacaq mükafatlandırma mərasimi daxildir. Festivala xaricdə yaşayan həmyerlilərimiz, o cümlədən xaricdə yaşayan digər millətlərin nümayəndələri qatıla biləcəklər”.
N.Bəşirzadə deyib ki, festival, Avropada yaşayan həmyerlilərimizi bir araya gətirmək, onları daha da yaxın etmək, onlar arasındakı ünsiyyəti artırmaq üçün fürsət yaradacaq: “Eyni zamanda, bu tədbir Avropada yaşayan digər millətlərin nümayəndələrinin Azərbaycanın tarixi, mədəniyyəti, coğrafiyası haqqında məlumat və biliklərinin daha da artırılmasına zəmin yaradacaq”. Xatırladaq ki, “Bakının Birİncisi” Beynəlxalq İntellektual Festivalı Azərbaycan Diasporuna Dəstək Fondunun dəstəyi ilə ilk dəfə olaraq Azərbaycandan kənarda keçiriləcək.
“Bakının Birİncisi” Beynəlxalq İntellektual Festivalı daha öncə 2009-2014-ci illər aralığında Bakı şəhərində keçirilibr. Hazırda keçiriləcək festival sayca 6-cı olacaq.
