Son yeniləmə: 3 Dekabr 2021 00:31
Bayraqdar.info – Eskişehir Azərbaycanlılar Dərnəyi (EsAzDer) tərəfindən təşkil edilən “Çərşənbə söhbətləri” davam edir. Hər dəfə bir maraqlı mövzudan bəhs edən ənənəvi həftəlik tədbir bu dəfə də yaddaqalan olub.
Belə ki, “Çərşənbə söhbətləri”nin bu dəfəki mövzusu “Fotoqrafiya sənəti” olub.
EsAzDer-dən bayraqdar.info-ya verilən məlumata görə, mövzunun moderatoru sənəti ilə Türkiyədə səs salmış, xüsusi ilə Eskişəhər xalqı tərəfindən sevilən, sayılan Güney Azərbaycanlı fotoqraf Haadi Mousavi olub.
50-dən çox gənc, dərnək üzvü, həmçinin universitet müəllimlərinin də iştirak etdiyi tədbirdə fotoqrafiyanın incəliklərindən bəhs edilib. Hər kəs tərəfindən maraqla dinlənilən söhbət sonrası iştirakçıların sualları cavablandırılıb.
Tədbirin sonunda H.Mousavi Eskişehir Azərbaycanlılar Dərnəyi başqanı Cavid Aydın tərəfindən təşəkkürnamə ilə təltif edilib.
Məlumatda o da bildirilir ki, H.Mousavi 2013-cü ildən etibarən fotoqrafiya sənəti ilə maraqlanıb və özünü inkişaf etdirib. Onun əsərləri Eskişəhər xalqı tərəfindən maraqla izlənir.
