Bayraqdar.info – Bosniya və Herseqovinada vəziyyət hər ötən gün daha da gərginləşir. Bunun səbəbi isə serb lider Milorad Dodikdir.
Bosniya və Herseqovinanı parçalamaq üçün hər yola baş vuran M.Dodik artıq Qərbin də qəzəbinə səbəb olub.
Bu arada Demokratik Fəaliyyət Partiyasının (SDA) sədri Bakir İzzetbegoviç M.Dodikə sanksiya tətbiqinin kifayət etməyəcəyini bildirib.
Balkan News-un məlumatına görə, BBC-yə açıqlama verən B.İzzetbegoviç çox sərt danışıb. Belə ki, o, Müstəqil Sosial Demokratlar Alyansının (SNSD) lideri M.Dodikin ölkənin parçalanması üçün əlindən gələni etməyə çalışdığını bildirib.
B.İzzetbegoviç deyib ki, M.Dodik bacarsa, Serb Respublikasını Bosniya və Herseqovinadan qoparar: “M.Dodik hər gün problemlər yaradır. Son 15 ildə çoxlu neqativ hərəkətlər olub. Bizi bunlara cavab verməyə məcbur edir. Amma mən hər şeyi edəcəyəm ki, bu siyasi mübarizə olaraq qalsın, münaqişəyə çevrilməsin”.
B.İzetbegoviç bildirib ki, Serb qurumunda aparteid tətbiq olunur. Serblərin idarə etdiyi bölgədə bosniyalılar və xorvatlarla ikinci dərəcəli vətəndaş kimi rəftar edilir: “Biri çıxıb Radovan Karaciçi tərifləyir. Bunun necə bir təxribat olduğunu təsəvvür edə bilərsinizmi? M.Dodik məhz bunu edir. Bu böhran ona görə başladı ki, Ali Nümayəndə hərbi cinayətkarların təriflənməsini və soyqırımı inkar etməyi qadağan etdi. Burada mənim və ya Ali nümayəndənin məsuliyyəti varmı? Mən belə düşünmürəm”.
M.Dodikə qarşı sanksiyaların tətbiqinin kifayət etməyəcəyini və daha sərt tədbirlərin görülməsinin lazım olduğunu vurğulayan B.İzzetbegoviç daha sonra deyib: “Problem yaradanlara qarşı çox daha təsirli və ağrılı bir şey etmək lazımdır. ABŞ-ın bunu edəcəyini gözləyirik. Onlar bunu edə bilərlər. Avropa İttifaqında çaşqınlıq var və bunun üçün onların konsensusa ehtiyacı var. Lakin amerikalılar bunu edə bilər və etməlidirlər”.
