Bayraqdar.info – Noyabrın 30-da Azərbaycanın sayılıb-seçilən hərbçilərinin helikopter qəzasında həlak olması insanlarımızı əməlli-başlı üzmüşdür. Bu da təbiidir. Çünki 44 günlük Vətən savaşından sonra ölkəmizdə hərbçilərə olan hörmət artmış, onları hər kəs özünün ailə fərdi kimi qəbul etməyə başlamışdır. Yəni 14 zabitin birdən bir helikopter qəzasında həlak olması, əlbəttə ki, ölkədə üzüntüyə səbəb olmalıydı, oldu da.
Bunun fonunda iki ayrı hadisə də diqqət çəkdi. Və təəssüf ki, hər iki hadisə ölkəmizin ümumi obrazına qara damğa basdı…
Birinci hadisə hazırda həbsdə aclıq aksiyası keçirən hərəkatçı Saleh Rüstəmlinin müdafiəsinə yönəlik aksiyadan sonra ortaya çıxan acı görüntüylə bağlıdır. O haqda yazmazdan öncə qeyd edək ki, S.Rüstəmli haqsız yerə həbs edildiyi iddiasıyla xeyli müddətdir həbsxanada aclıq aksiyası keçirir. Onun bəlli bir müddət həbsdə qaldığını, azad edilərsə cəmiyyətə hər hansı bir zərərinin toxunmayacağını düşünən bir sıra tanınmış ictimai-siyasi xadim bir müddət öncə hətta Prezidentə müraciət edərək S.Rüstəmlini azad etməsini də istəmişdi. Müraciət müəllifləri Azərbaycanın sayılıb-seçilən, bu dövlətin mənafeyini üstün tutan dəyərli insanlar idi və təbii ki, onların bu istəyi nəzərə alınmalıydı. Özü də əlavə edək ki, onların arasında demək olar ki, Prezident İlham Əliyevin heç bir əleyhdarı yox idi. Yəni ölkə başçısının öz tərəfdarlarından, özü də bu qədər məşhur və sözü keçən tərəfdarlarından daxil olan müraciətə biganə yanaşmayacağı aydın məsələdir.
Radikal aksiya qərarı verildi
Lakin nə baş verdi? Müraciətin mürəkkəbi qurumamış bir dəstə peyda oldu, radikal aksiya qərarı verdi. Bu adamları sanki kimsə səfərbər etdi, məhz o müraciəti gözdən salıb S.Rüstəmlinin həbsdən çıxmasını əngəlləmək üçün meydana sürdü.
Bütün bunlar bir yana, maraqlıdır ki, həmin o radikal qrup məhz 14 şəhid hərbçinin dəfn edildiyi gün meydana çıxıb aksiya keçirdi! Bircə gün dözə bilməzdilərmi? Cəmi bircə gün sonra etsəydilər bu aksiyanı nə dəyişəcəkdi ki? Lazım idimi ki, məhz ölkə vətəndaşının diqqəti 14 şəhidin acısına köklənmişkən diqqəti başqa yönə çəkib Azərbaycanı qlobal müstəvidə heç dəxli olmayan məsələ ilə gündəmə gətirmək? Yaxud da hərbçilərin şəhid olmasının fonunda məqsədli şəkildə belə bir aksiya keçirənlərin milli vətənpərvərlik duyğuları haqqında biz nə düşünməliyik?
Bu aksiya öz yerində. S.Rüstəmli ilə bağlı da o fikirdəyik ki, onu həbsdən buraxmaq, özü də əfv etmək ən doğru seçim olardı. Çünki S.Rüstəmli vətənpərvər insandır və həbsdən buraxıldıqdan sonra ondan Azərbaycana heç bir zərər gəlməyəcək.
Və bu aksiyanı keçirənlər arasında məlum və məşhur Tofiq Yaqublu olayı. İrəli qaçaraq qeyd edim ki, bu adamın davranışları şəxsən mənə heç vaxt xoş gəlməyib. Amma nə edə bilərik? Onun seçimi elədir. Ümumiyyətlə isə necə davranmağını şəxsən mən Azər Həsrətdən soruşmalı deyil. Bu, öz yerində. Sadəcə yerində olmayan odur ki, indi medianı bu adamın vəhşicəsinə döyülməsini göstərən fotoları bəzəyir! Bax, bu lazım deyildi!
Olayın arxasındakı şəxslər və məqsəd
Kim etdi bunu? Niyə etdi? Məqsəd nədir axı? T.Yaqublunu qorxutmaq? Boş şeydir! Bu adam zatən kəfəni boynunda gəzir həmişə. Tərbiyə etmək? Bu da keçərli metod deyil. Çünki bir adamı tərbiyə etmək üçün bu qədər şiddət əsla işə yaramaz! Hələ T.Yaqublu kimi adama bu yöntəm heç yaramaz!
T.Yaqublunun o “bərbəzəkli” şəkilləri indi bir çoxları üçün əlavə qrant mənbəyi oldu. Bundan başqa Azərbaycan hakimiyyətinə loyal yanaşanları belə özündən çıxardı (sosial media hakimiyyətin tərəfində olanların bu olayla bağlı qəzəbini ehtiva edən açıqlamalarla doludur). Yəni T.Yaqublu döyülərək növbəti dəfə gündəm oldu, qəhrəman oldu və Azərbaycan hakimiyyətinin əleyhinə əla bir vasitəyə çevrildi.
İndi təsəvvür edirəm ki, bundan sonra illər uzunu T.Yaqublunun məlum şəkli çox vacib hesabatların, nəşrlərin üz qabıqlarını bəzəyəcək və Azərbaycan dövlətinin əleyhinə işləyəcək! Kim etdi bunu? Araşdırmaq lazımdır. Buna qərar verənlərin və icra edənlərin Azərbaycan dövlətinə fayda vermək istədiyini şəxsən mən düşünə bilmirəm!
T.Yaqublunu qanunsuz aksiya keçirdiyinə görə ərazidən uzaqlaşdırmaq da, qısa müddətə saxlamaq da, lazım gəlsə inzibati qaydada cəzalandırmaq da olardı. Amma bu edilmədi. Əksinə, onu döyüb, üz-gözünü bəzəyib cəmiyyətin içinə buraxdılar ki, hakimiyyətdən narazılıq artsın!
Poqonlu adam jurnalistə yumruq atdı
Və, təəssüf ki, dekabrın 1-də daha bir xoş olmayan görüntü mediada tirajlandı. Dövlət Sərhəd Xidmətinin mayoru Rövşən adlı şəxs Baku TV-nin kamerasına yumruq ataraq gərəksiz bir hərəkətə yol verdi.
Lazım idimi bu? Ümumiyyətlə, bu hərəkətə nə gərək vardı? Ölkənin diqqəti şəhidlərin dəfninə yönəlib, imkanı olan dəfnə gəlib, olmayanlar da onlayn olaraq izləyir. Belə bir yerdə jurnalistin canlı yayıma çıxıb ictimaiyyəti operativ məlumatlandırması bu poqonlu “qəhrəmanı” niyə narahat etməlidir axı? Üstəlik deyirlər ki, özü də keçmişdə jurnalist olubmuş…
Bu hadisələr bir daha göstərir ki, ölkədə hələ də yerində olmayanlar var. Bu hadisələr bir daha sübut edir ki, Prezident İlham Əliyevin xalqla bütünləşmə yolunda atdığı addımları sabotaj etməyə cəsarət göstərənlər hələ də qalır. Son bir neçə ildə Prezidentə sadiq insanları bütün sektorlarda sıxışdıranlar, islahat adı altında dəxli oldu-olmadı kimi gəldi, çox zaman da antimilli olduqları sifətlərindən oxunanları vəzifələrə daşıyanlar, belə anlaşılır ki, Prezidentə son zərbəni vurmaq üçün məşq edirlər. Bunun başqa adı yoxdur!
Bir də nəzərə alaq ki, bu ayıb olacaq hadisələr Prezidentin dekabrın 15-də Brüsseldə Avropa Birliyi Şərq Tərəfdaşlığı ölkələrinin Zirvə görüşü öncəsi baş verir. Ki, orada insan haqları, demokratik azadlıqlar məsələsi həssas bir şəkildə masaya yatırılacaq. Əlavə olaraq da Azərbaycan Prezidenti Ermənistan Baş naziri ilə görüşəcək. Bu görüş AB Şurasının Prezidenti Şarl Mişelin vasitəçiliyi ilə olacaq. İndi sual yaranır: belə bir vacib səfər ərəfəsində Prezidentin əlini zəiflətmək kimə lazımdır?..
[…] Prezident İlham Əliyevin əli zəiflədilir… – VİDEO […]