Son yeniləmə: 30 Noyabr 2021 11:37
Bayraqdar.info – “Rəqəmsal icra hakimiyyəti” – rih.gov.az portalı üzrə rayonlarda maarifləndirmə işlərinə başlanılıb. Qeyd edək ki, bu portal Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin Elektron Hökumətin İnkişafı Mərkəzi (EHİM) tərəfindən yaradılıb.
Bununla bağlı “ASAN xidmət”dən bayraqdar.info-ya noyabrın 30-da verilən məlumatda deyilir maarifləndirmə işləri ASAN könüllüləri tərəfindən aparılır.
Belə ki, ASAN könüllüləri ötən həftədən başlayaraq layihənin reallaşdırıldığı Gəncə şəhəri, eləcə də Quba və Masallı rayonlarında yerləşən “ASAN xidmət” mərkəzlərində vətəndaşları məlumatlandırırlar. Könüllülərin fəaliyyətinin əsas məqsədi vətəndaşların yeni yaradılan portal haqqında məlumatlandırılması, onlara xidmətlərdən istifadə ilə bağlı dəstəkdir.
“Könüllülər vətəndaşlara rih.gov.az portalının vətəndaşlara verdiyi üstünlük, yerli icra hakimiyətlərinə onlayn və ya fiziki görüşün əldə edilməsi üçün elektron müraciət, portalda yer almış mümkün elektronlaşdırılmış xidmətlər və s. haqda məlumat verir, portalda onlayn qeydiyyatdan keçmək istəyən vətəndaşlara dəstək olurlar”, – deyə məlumatda vurğulanır.
Qeyd edilir ki, könüllülərə fəaliyyətə başlamazdan öncə EHİM əməkdaşları tərəfindən təlimlər keçirilib. Təlimlərdə könüllülərə müvafiq məsələ ilə bağlı bilgilər verilib.
Məlumat üçün bildirək ki, “Rəqəmsal icra hakimiyyəti” layihəsinin əsas hədəfi vahid məkandan xidmətlərə elektron çıxışın təmin edilməsi, vətəndaşların vaxtına qənaət edilməsi, vətəndaş məmnuniyyətinin artırılması, eləcə də data əsaslı operativ qərar qəbuletməyə nail olunmasıdır. “Rəqəmsal icra hakimiyyəti” portalı Dövlət Agentliyi ilə Almaniya Beynəlxalq Əməkdaşlıq Cəmiyyəti (gız) tərəfindən həyata keçirilən “Yerli İnkişaf üçün Yaxşı İdarəetmə” layihəsi çərçivəsində yaradılıb.
Layihənin digər istiqaməti “Yerli icra hakimiyyətlərində ASAN standartlarının tətbiq edilməsi”dir. Layihə ilkin mərhələdə sosial-iqtisadi aktiv 3 bölgə – Gəncə şəhəri, Masallı və Quba rayonlarında həyata keçirilir. Müvafiq icra hakimiyyətləri Azərbaycanın hər bir zonasını (şimal, cənub və qərb) təmsil etməsinə, əhali çoxluğuna və “ASAN xidmət” mərkəzlərinin yerləşməsinə görə seçilib
