Son yeniləmə: 30 Noyabr 2021 13:08
Bayraqdar.info – İnsanın İmmunçatışmazlığı Virusunun (İİV) ölkədə yayılmasının qarşısını almaq, əhalinin sağlam həyat tərzi barədə məlumatlandırmaq məqsədilə Səhiyyə Nazirliyinin Respublika QİÇS-lə Mübarizə Mərkəzi (RQMM) Azərbaycanda “Avropa İİV-ə testləşmə həftəsi-2021”ə başlayıb.
Noyabrın 30-da Səhiyyə Nazirliyindən bayraqdar.info-ya verilən məlumatda bildirilir ki, bu günədək RQMM Azərbaycan Memarlıq və İnşaat Universitetində, Azərbaycan Dövlət Mədəniyyət və İncəsənət Universitetində, Azərbaycan Dövlət Neft və Sənaye Universitetində müayinələr keçirib. Həmçinin, Sumqayıt “ASAN xidmət” mərkəzində, Sumqayıt Dövlət Universiteti nəzdində Sumqayıt Dövlət Texniki Kollecində, Şəki Tibb Kollecində, Lənkəran Şəhər Peşə Texniki Liseyində maarifləndirmə aksiyaları təşkil edib. Universitetlərdə və kollecdə tələbələrə təcrübəli həkimlər tərəfindən İİV/QİÇS-lə bağlı mühazirələr oxunulub, xəstəliyin tarixi, yoluxma yolları, profilaktikası, müayinəsi və müalicəsi barədə ətraflı məlumat verilib. Tələbələri maraqlandıran suallara cavablar verilib, pulsuz və anonim qaydada İİV-ə ekspres-testdən keçmək imkanı yaradılıb.
“Eyni zamanda, təhsil ocaqlarında münasib yerdə quraşdırılan informasiya guşəsində yüzlərlə vətəndaş həkimlərin təcrübəsindən yararlanıb. Onlara İİV/QİÇS-ə aid broşurlar, bukletlər paylanır, xəbərdaredici məlumatlar verilib. Təbirlər yeni növ koronavirus (COVID-19) pandemiyasının tələblərinə uyğun (sosial məsafəni qorumaq və tibbi maskadan istifadə) şəkildə təşkil olunub.
“Qeyd edək, ki maarifləndirmə tədbirləri 1 dekabr – Ümumdünya QİÇS-lə Mübarizə günündən sonra da, Bakı və Sumayıt şəhərlərində, bölgələrdə insanların daha çox olduğu ünvanlarda davam etdiriləcək”, – deyə məlumatda bildirilir.
