Son yeniləmə: 29 Noyabr 2021 12:02
Bayraqdar.info – Noyabrın 28-dən dekabrın 7-dək Özbəkistanın Daşkənd şəhərində “MDB, Baltikyanı ölkələr və Gürcüstanın IV Gənclər Teatr Forumu” keçiriləcək.
Bu barədə bayraqdar.info-ya Akademik Dövlət Musiqili Teatrından bildirilib.
“Mədəniyyət Nazirliyinin dəstəyi ilə Azərbaycanı təmsil edəcək sənət adamlarının sırasında Teatrın baş rəssamı Vüsal Rəhim də var.
“İstedadlı rəssam 10 gün ərzində müxtəlif proqramlarda, sərgilərdə iştirak edəcək, müəllifi olduğu səhnə və geyim esgizlərini nümayiş etdirəcək. O, eyni zamanda, forum çərçivəsində mühazirələrə, ustad dərslərinə qatılacaq və komanda halında təşkil edilən maarifləndirici proqramlarda öz təcrübəsini dünyanın müxtəlif ölkələrindən olan həmkarları ilə bölüşəcək. V.Rəhim forum iştirakçıları olan rəssamlarla birgə təklif olunan tamaşalara esgizlər hazırlayacaq.
“Qeyd edək ki, daha sonra həmin esgizlər Vladimir Nikolaeviç Pankovun “Daşkənd – Çörək şəhəri” hekayəsi əsasında hazırlanacaq tamaşada fraqmentlər şəklində birləşdiriləcək.
“Gənc rəssam səfər öncəsi ona beynəlxalq əhəmiyyətli tədbirdə iştirakına şərait yaradan hər kəsə təşəkkürünü bildirib”, – deyə Teatrın xəbərində bildirilir.
