Son yeniləmə: 27 Noyabr 2021 00:37
Bayraqdar.info – Müdafiə naziri general-polkovnik Zakir Həsənov və nazirliyin digər rəhbər heyəti Qusar şəhəri ərazisindəki Şəhidlər xiyabanını ziyarət edib.
Məlumat bayraqdar.info-ya Müdafiə Nazirliyindən verilib.
Azərbaycanın ərazi bütövlüyü uğrunda şəhid olan vətəndaşların xatirəsinə ucaldılmış abidə önünə gül dəstələri düzülərək ehtiram ifadə olunub.
Müdafiə naziri burada Qusar Rayonu İcra Hakimiyyətinin rəhbərliyi, şəhid ailələri və ictimaiyyət nümayəndələri ilə görüşüb.
Görüş zamanı Milli Qəhrəman Çingiz Qurbanovun atası Salman Qurbanov Vətən müharibəsində qazanılan qələbənin xalqımıza böyük sevinc yaşatdığını vurğulayıb. O, şəhid ailələrinə göstərilən diqqət və qayğıya görə Prezident İlham Əliyevə və Müdafiə Nazirliyinin rəhbərliyinə şəhid ailələri adından təşəkkürünü bildirib.
Şəhidlərin xatirəsinin dövlət tərəfindən hər zaman ehtiramla yad edildiyini diqqətə çatdıran nazir şəhid ailələrinin problemləri və istəkləri ilə maraqlanıb.
