Son yeniləmə: 25 Noyabr 2021 17:27
Bayraqdar.info – “Azərbaycan Xəzər Dəniz Gəmiçiliyi” QSC-nin (ASCO) Azərbaycan Dövlət Dəniz Akademiyasında “Dəniz naviqasiyası mühəndisliyi” ixtisası üzrə təhsil alan III və IV kurs tələbələrinin ASCO-nun Dəniz uzaq səfərlər kapitanı Şahlar Məmmədov, “Caspian Marine Services”-in təcrübəli kapitanları Vaqif Məhərrəmov və Əfqan Abdullayevlə görüşü keçirilib.
Görüş ADDA-nın “Gəmi sürücülüyü” fakültəsinin və “Dəniz naviqasiyası” kafedrasının təşkilatçılığı ilə baş tutub.
Xəbər bayraqdar.info-ya ASCO-dan daxil olub.
Xəbərdə bildirilir ki, görüşün əvvəlində şəhidlərin əziz xatirəsi bir dəqiqəlik sükutla yad olunub.
Görüşdə Vətən müharibəsində şanlı tarix yazan qəhrəmanlar sırasında yer alan ASCO-nun əməkdaşlarından, Azərbaycan Dövlət Dəniz Akademiyasının və Dənizçilik Kollecinin məzunlarından bəhs edən video nümayiş etdirilib.
Sonra kapitan Ş.Məmmədov Bakı Dəniz Yolları məktəbində təhsil aldığı illər, kapitan kimi çalışdığı dövrlər barədə xatirələrini və təəssüratlarını bölüşüb. Ş.Məmmədov gənclərə hər zaman üzərlərində işləməyi, dərslərini mükəmməl oxumağı və peşələrini sevməyi tövsiyə edib.
“Lənkəran” yedək təchizat gəmisinin kapitanı Vaqif Məhərrəmov tələbələrə ixtisasları ilə yanaşı, ingilis və rus dillərini mükəmməl öyrənməyi məsləhət görüb.
Yekunda “Gəmi sürücülüyü” fakültəsinin dekanı Elnur Abbasov təcrübəli kapitanlara tələbələrlə görüşə gəldikləri üçün minnətdarlığını bildirib. O qeyd edib ki, bu tədris ilində “Dəniz naviqasiyası mühəndisliyi” ixtisası üzrə Azərbaycan və rus bölmələri ilə yanaşı, ingilis bölməsində də məzun buraxılışı olacaq.
Sonda Ş.Məmmədov, V.Məhərrəmov və Ə.Abdullayev karyera yüksəlişi, gəmi qəzaları, DP sistemli gəmilər və s. mövzularda tələbələri maraqlandıran sualları ətraflı cavablandırıblar. Görüş tələbələrin və kapitanların böyük məmnunluğu ilə başa çatıb.
