Son yeniləmə: 24 Noyabr 2021 01:12
Qədim türklərin qəhrəmanlıq və sevgi “Destan”ı
Bayraqdar.info – Son illər türk tarixindən bəhs edən silsilə serialların çəkilməsi ilə önə çıxan Türkiyə telekanalları bu istiqamətdə davamlı addımlar atır. Belə addımlardan biri də ATV kanalı tərəfindən atılıb. Belə ki, noyabrın 23-də bu kanalın istehsalı olan yeni “Destan” serialının ilk bölümü yayımlanıb.
Mövzu və aktyor heyəti ilə diqqət çəkən serial elə ilk bölümündən bütün reytinqləri alt-üst etməkdə iddialı olduğunu ortaya qoyub. Qeyd edək ki, qədim türklərin “Gök Tengriye and olsun ki!” andının tez-tez eşidildiyi serialda güclü və döyüşkən Akkızla yanaşı, Batuga, cəsur və qəddar Alpagu Han, Ulu Ece və Balamir Beg kimi personajlar yer alır.
Serialın aktyor heyətində isə Ebru Şahin, Edip Tepeli, Selim Bayraktar, Deniz Barut kimi istedadlı adlar yer alıb.
Beləliklə, serialda VIII əsrdə Orta Asiyada, İslamın hələ tam hakim olmadığı torpaqlarda baş verən ağır mübarizələrdən bəhs edilir. Elə bir dövr ki, Çin dişlərini türk millətinə qıcıyıb, rus varyaqlar, monqollar, soqdlar, farslar pusquda gözləyirlər.
Bu azmış kimi, eyni qanın daşıyıcısı olan türk boyları bir-birinə qılınc çəkirlər. Hər ikisi türk olan Gök xanlığı ilə Dağ xanlığı arasında böyük düşmənçilik hökm sürür.
Belə bir ağır şərtlərin fonunda Gök xanlığının böyük xanı Alpagu xan üsyanda şübhələndiyi qardaşı Balamir Yabgunun qızını öz axsaq oğlu Batugaya gəlin etmək qərarına gəlir.
O, ailəsini toplayıb qız istəmək üçün Qərbi Gök Xanlığına yola düşür. Lakin bu zaman onları yolda böyük təhlükə gözləyir: Uşaqlıqdan intiqam atəşi ilə yanan dağ döyüşçüsü Akkız!
Beləliklə, həm qədim türklərin dini inancı, həm döyüş bacarığı, həm də iki gəncin sevgi hekayəsini tamaşaçıya çatdıracaq “Destan”ın hər bir kadrı dastan kimi önəm kəsb edir.
Onu da bildirmək yerinə düşər ki, “Destan”ın prodüsseri tamaşaçılar tərəfindən böyük rəğbət qazanan “Diriliş Ertuğrul”, “Quruluş Osman”kimi tarixi seriallara da prodüserlik etmiş Mehmet Bozdağdır.
