Bayraqdar.info – Güney Azərbaycanın paytaxtı Təbrizin küçələrində divar və maşınların üzərində bildirişlər yayılıb. ArazNews-un verdiyi məlumata görə, bu bildirişlərdə İran rejimi tərəfindən Güney Azərbaycan əleyhinə aparılan iqtisadi ayrı-seçkiliyə və bu ayrı-seçkiliyə etiraz edən Azərbaycanlı fəalların cəzalandırıldığına diqqət çəkilib.
Bildirişdə Şərqi Azərbaycanın əski valisinin aşağıdakı sözlərinə yer verilib: “Hər gün Qaradağın Süngün mis mədənindən 50 milyard tümənlik xam maddə Kirmana aparılır. Bu pul Azərbaycanda qalsa bura cənnət olardı”.
Bildirişdə o da deyilir ki, İran rejimi Güney Azərbaycanda müstəmləkəçi siyasət yürüdür. Bu duruma etiraz edən Güney Azərbaycanlı fəallara isə ağır həbs cəzaları verilir.
Bildirşdə qeyd edilir ki, Əlirza Fərşi, Əkbər Azad, Abbas Lisani, Siyamək Mirzayi, Tohid Əmir Əmini və daha onlarca Güney Azərbaycanlı milli fəal 5-15 il arası ağır həbs cəzaları alıblar.
Son günlərdə ərdəbilli milli fəal Pərviz Siyabi’yə 16 il həbs cəzası verildiyi bildirilmişdir.
