Bayraqdar.info – Azərbaycanın “ASAN xidmət” modeli kimi könüllülük sahəsindəki addımları da yaxın və uzaq xaricdə maraqla qarşılanır. Artıq ölkəmizin hönüllük sahəsindəki təcrübəsinin öyrənilməsi istiqamətində müvafiq addımlar da atılır.
Belə ki, Qazaxıstan könüllüləri Azərbaycanda könüllülük sahəsində təcrübəni öyrənmək üçün ölkəmizə səfərə gəlib. Bu barədə bayraqdar.info-ya Əmək və Əhalinin Sosoial Müdafiəsi Nazirliyindən məlumat verilib.
Bildirilib ki, Qazaxıstan könüllüləri ölkəmizdə könüllülük hərəkatının aktiv iştirakçılarından olan DOST könüllüləri ilə görüşüblər. 4 saylı Bakı DOST Mərkəzi ilə tanış olan qazaxıstanlı könüllülərə Dayanıqlı və Operativ Sosial Təminat (DOST) Agentliyinin fəaliyyəti, eləcə də “Könüllü DOST” proqramı haqqında məlumat verilib. Görüş zamanı qeyd edilib ki, 2019-cu ilin may ayından fəaliyyətə başlayan DOST mərkəzlərində hazırda 200 gənc könüllü çalışır. Bununla yanaşı, ilk dəfə olaraq yaşlı insanların asudə vaxtının səmərəli keçirilməsi məqsədilə “Gümüşü DOST” proqramı da icra olunur.
Vurğulanıb ki, “könüllülər əmək, məşğulluq, sosial müdafiə və sosial təminat sahələrində xidmətlərdən istifadə edən vətəndaşlara mərkəzlərdə kömək edir, onlara zəruri sənədlərin hazırlanmasında dəstək olur, həssas qruplardan olan şəxslərə qayğı göstərir”.
Qazaxıstan könüllüləri “Könüllü DOST”larla birlikdə DOST mərkəzində xidmət göstərərək təcrübə mübadiləsi də aparıblar. Qrupun koordinatoru Aygerim Jarılqasova bu səfərin təcrübə mübadiləsi baxımından əhəmiyyətini xüsusi vurğulayıb. O, bu sahədə bundan sonra da qarşılıqlı əməkdaşlığın vacibliyini qeyd edib.
Sonda xatirə şəkli çəkilib, qonaqlara hədiyyələr təqdim olunub.
Səfər Qazaxıstan Milli Könüllülər Şəbəkəsi ilə Azərbaycan Könüllü Təşkilatları İttifaqının bu sahədə təcrübə mübadiləsi proqramı əsasında həyata keçirilir.
