Bayraqdar.info – “İlk olaraq Türk Dövlətləri Təşkilatının yaranması münasibətilə dünya türklərini, o cümlədən Azərbaycan türklərini təbrik edirəm. Əvvəllər regional təşkilat kimi yaranan Türk Keneşi noyabrın 12-də İstanbulda keçirilən VIII Zirvə Görüşündə alınan qərarla Türk Dövlətləri Təşkilatı oldu. Bu, sıradan bir ad dəyişikliyi deyil. Bununla əvvəllər regional təşkilat kimi yaranmış türk birliyi artıq beynəlxalq təşkilat oldu. Bu addım isə çox böyük əhəmiyyətə malikdir”.
Bunu bayraqdar.info-ya özəl açıqlamasında Güney Azərbaycan Demokrat Partiyasının sözçüsü Mahmud Bilgin deyib.
Türk Dövlətləri Təşkilatının yaranmasının İran və Güney Azərbaycan baxımından hansı təsir oyadacağına gəlincə, müsahibimiz öncə aşağıdakıları bildirib: “Təəssüflər olsun ki, İran bölgədə çox yanlış siyasət yürüdür. Bəlli olduğu kimi İran bu vaxta kimi Türkmənistanın Türk Keneşinə qoşulmamasını sevinclə qarşılayır, türk birliyinin baş tutmayacağını düşünürdü. Lakin İstanbuldakı Zirvə Görüşündən sonra vəziyyət dəyişdi. Artıq Türkmənistan da Türk Dövlətləri Təşkilatının üzvüdür. Düzdür, hələlik müşahidəçi statusla. Ancaq gec-tez bunun tamhüquqlu üzvlüklə əvəz ediləcəyinə kimsə şübhə etmir. Yəni, İranın türk birliyinin baş tutmaması arzusu reallaşmadı. Bu gün türk dövlətlərinin birliyi İranın yuxusunu ərşə çəkib. Düşünürəm ki, İran bundan sonra təşkilatda hansısa formada təmsil olunaraq, qurumun daxilində gərginlik, təxribat, fikir ayrılığı yaratmaq istəyə bilər. Lakin bu istəyin də daşa dəyəcəyi bəri başdan bəllidir. Çünki qurumda təmsil olunan bütün dövlətlərin idarəediciləri, rəhbərləri kifayət qədər ayıq-sayıq və qətiyyətlidirlər”.
M.Bilgin İranın bu cür davranışının heç də səbəbsiz olmadığını deyib: “Fars rejimi yaxşı bilir ki, Türk Dövlətləri Təşkilatının yaranması İrandakı türklər arasında milli oyanışı daha da artıracaq. Xüsusilə də bu təşkilatın mərkəzində Türkiyə-Azərbaycan qardaşlığının dayanması İran türklərinə əlavə təkan verəcək”.
“Ümid edirəm ki, hazırda iqtisadi və elmi istiqamətdə inteqrasiyanı əsas götürən Türk Dövlətləri Təşkilatı gələcəkdə siyasi və hərbi sahədə də mərkəzləşdirilmiş bir qurum olacaq. Çünki hazırda təşkilat indiki formasında dünyada cəmi 170 milyon türkü əhatə edir. Ancaq 300 milyon türkü əhatə etməlidir. Yəni, 130 milyon türk hələ öz müqəddəratını həll edə bilməyib ki, bu xüsusda Güney Azərbaycan türklərini xüsusi olaraq vurğulamalıyıq” , – deyən müsahibimizin sözlərinə görə, İranın 40 faizini təşkil etməsinə baxmayaraq Güney Azərbaycan türkləri milli-siyasi hüquqlardan istifadə edə bilmirlər.
M.Bilgin qeyd edib ki, Türk Dövlətləri Təşkilatının yaranması Güney Azərbaycan türkləri üçün çox böyük önəm daşıyır: “Azərbaycanın İkinci Qarabağ müharibəsindəki tarixi Zəfərindən sonra belə bir təşkilatın yaranması bizim üçün qürurverici, sevindirici və gələcəyimizə işıq tutan bir hadisədir. Bunun Güney Azərbaycan Milli Azadlıq Hərəkatı üçün təsirinə gəlincə, deyim ki, İranda yaşayan türklər, özəlliklə də Güney Azərbaycan türkləri daha böyük bir dayaq əldə edirlər. Yəni, İrançılığa qarşı daha güçlü dayak əldə etdik. Bu, Güney Azərbaycan türklərinin öz milli və siyasi haqlarının əldə edilməsi istiqamətində çox böyük önəm daşıyır. İkinci məsələ budur ki, Azərbaycanın tarixi Zəfərindən, həmçinin Türk Dövlətləri Təşkilatının yaranmasından sonra Milli Hərəkatımız Güney Azərbaycanda özünə daha çox güvən qazanıb. Çünki artıq dünyada türk dövlətləri adı ilə və türk dövlətlərinin maraqlarına xidmət edən bir beynəlxalq təşkilat yaranıb. Güney Azərbaycan Milli Azadlıq Hərəkatı da xaricdən onu dəstəkləyəcək bir qurumun mövcud olduğunu görür, daha inamlı addım atır. Bu isə sonda Bütöv Azərbaycanın yaranmasına da böyük zəmin yaradır”.
