Bayraqdar.info – Avropanın ürəyi sayılan Brüsseldə Xivə Mədəniyyət Günləri başlayır. Bu barədə Beynəlxalq Türk Mədəniyyəti Təşkilatından (TÜRKSOY) məlumat verilib.
Bildirilib ki, 15-18 noyabr 2021-ci il tarixlərində “Brüsseldə Xivə Mədəniyyət Günləri” adı altında keçiriləcək tədbirlər çərçivəsində avropalı sənətsevərlər Özbəkistanın mirvarisi olan Xivə şəhərini daha yaxından tanıyacaq.
Tədbir TÜRKSOY tərəfindən Avropa Parlamentinin Avropa İttifaqı-Özbəkistan Dostluq Qrupu, Özbəkistan Mədəniyyət Nazirliyi və Özbəkistanın Brüsseldəki səfirliyinin təşkilatçılığı, həmçinin Türkiyə Odalar və Borsalar Birliyi (TOBB) və Brüsseldə fəaliyyət göstərən “Diplomatic World” nəşrinin dəstəyi ilə keçirilir.
Açılış mərasimi noyabrın 15-də Özbəkistanın Brüsseldəki səfirliyinin iqamətgahında konsert və qastronomiya şousu ilə gerçəkləşəcək. Mədəniyyət Günləri çərçivəsində noyabrın 16-da Avropa Parlamentində “İpək Yolu üzərində mədəni irsin qorunması və təbliği; 2020-ci ildə Türk Dünyasının Mədəniyyət Paytaxtı Xivədən düşüncələr” adlı “dəyirmi masa” keçiriləcək.
Həmin gün TOBB Brüssel nümayəndəliyində açılacaq “2020-ci ildə Türk Dünyasının Mədəniyyət Paytaxtı Xivədən təəssüratlar” adlı foto sərgisi isə 3 gün ərzində ziyarətçilərin ixtiyarına veriləcək.
Tədbirlə bağlı açıqlama verən TÜRKSOY-un baş katibi Düsen Kaseinov deyib ki, “2012-ci ildə başladığımız Türk Dünyası Mədəniyyət Paytaxtı layihəsinin bu günə qədər gəlib çatmasından çox məmnunuq. Avropa Mədəniyyət Paytaxtları ilə Türk Dünyasının Mədəniyyət Paytaxtları arasında qarşılıqlı əlaqənin gündən-günə artdığının şahidi olmaq bizim üçün çox sevindirici hadisədir. Brüssel Avropanın ürəyidir. Tədbirimizlə xüsusi olaraq Xivəni təbliğ etməklə geniş perspektivdə türk dünyası ilə Avropa xalqları arasında mövcud olan mədəni körpünü daha da gücləndiririk. Avropa Parlamentinin üzvlərinin dəvəti ilə Aİ qərar qəbul edən şəxsləri, akademikləri, diplomatik nümayəndəlikləri və mədəniyyət ekspertlərini bir araya gətirəcək tədbirlərimizi dəstəkləyənlərə təşəkkürümü bildirirəm”.
Tədbirlərə ev sahibliyi edən Avropa Parlamentinin üzvü, Avropa İttifaqı-Özbəkistan Dostluq Qrupunun qurucu sədri Ryszard Czarnecki isə Brüsseldə Xivə Mədəniyyət Günlərinə ev sahibliyi etməkdən şərəf duyduğunu deyib: “Bizim Dostluq Qrupumuz Avropa və Özbəkistanın qərar qəbul edən şəxsləri, biznes və vətəndaş cəmiyyəti arasında dialoqu yaxşılaşdırmaq məqsədi daşıyır. Mədəniyyət, incəsənət, turizm və akademik sahələrə diqqət yetirməklə Aİ və Özbəkistanı birləşdirən mövcud təşəbbüslərə dəyər qatmağı hədəfləyirik. Yeni yaradılmış dostluq qrupumuz bundan sonra da Özbəkistan və Aİ xalqlarını bir araya gətirən fəaliyyətlərə diqqət yetirəcək”.
Özbəkistanın Brüsseldəki səfiri Dilyor Hakimov öz növbəsində qeyd edib ki, Özbəkistan mədəniyyət və adət-ənənələr diyarıdır: “İpək Yolu üzərində yerləşən Xivə Buxara və Səmərqənd kimi digər şəhərlərlə yanaşı, təhsil, elm və mədəniyyət mərkəzi, sivilizasiyaların beşiyi olmuşdur. Biz tarixi irsimizi dünyaya tanıtmaq, onu inkişaf vasitəsinə çevirmək istəyirik. Özbəkistanın müstəqilliyinin 30-cu ildönümündə TÜRKSOY-un hazırladığı “Xivə mədəniyyət günləri” bizim üçün çox mənalıdır”.
Xatırladaq ki, Türk Dünyasının Mədəniyyət Paytaxtı adı TÜRKSOY-un Daimi Şurasının iclaslarında üzv ölkələrin mədəniyyət nazirlərinin qəbul etdiyi qərarla elan edilir. Türk Dünyası şəhərlərinin mədəni və sənət həyatına rəng qatan bu qərarlar çərçivəsində 2012-ci ildə Qazaxıstanın Astana (indiki Nur-Sultan), 2013-cü ildə Türkiyənin Eskişehir, 2014-cü ildə Tatarıstanın Kazan, 2015-ci ildə Türkmənistanın Mərv, 2016-cı ildə Azərbaycanın Şəki, 2017-ci ildə Qazaxıstanın Türküstan, 2018-ci ildə Türkiyənin Kastamonu, 2019-cu ildə Qırğızıstanın Oş, 2020-ci ildə Özbəkistanın Xivə və 2022-ci ildə Türkiyənin Bursa şəhəri Türk Dünyasının Mədəniyyət Paytaxtı seçilib.
Onu da qeyd edək ki, 2023-cü ildə Azərbaycanın Şuşa şəhərinin Türk Dünyasının Mədəniyyət Paytaxtı seçilməsi gözlənilir.
