Bayraqdar.info – 3 saylı “ASAN kommunal” mərkəzində “INNOLAND AREA” mərkəzinin açılış tədbiri keçirilib. Bu, Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi” və AREA – Azərbaycan Robototexnika Mühəndisliyi Akademiyasının təşəbbüsü ilə baş tutub.
Bu barədə bayraqdar.info-ya noyabrın 15-də “ASAN xidmət”dən məlumat verilib.
Bildirilib ki, qonaqlar Dövlət Agentliyinin “İnnovasiyalar Mərkəzi” tərəfindən innovasiya ekosisteminə verilən dəstək, gənclərin gələcək inkişafı üçün onların bu sahədə dəyərləndirilməsi, innovativ düşüncə və rəqabətədavamlı biliklərin qazanılması v. s. istiqamətində görülən işlərin prioritet olduğunu vurğulayıblar. Həmçinin müxtəlif dövlət qurumları, şirkətlər və universitetlərin bu proseslərə aktiv şəkildə qoşulmasının vacibliyi qeyd edilib.
Sonda dronların yürüşü və robotlarla tanışlıq istiqamətində 4-7 yaş arası uşaqlar üçün “Robomonte”, 8-13 yaş arası uşaqlar üçün “Genesis” (Yapon Mühəndisliyi), 8-19 yaş arası uşaq və gənclər üçün isə Foster (Dünya Robot Olimpiyadasına hazırlıq) ustad dərsləri təşkil olunub.
O da bildirilib ki, “INNOLAND AREA” mərkəzinin yaradılmasında məqsəd startapların inkişafını təmin edəcək ekosistemin formalaşmasını dəstəkləmək və əlverişli şəraiti gücləndirməkdir: “O cümlədən 4-19 yaş arası uşaq və gənclərin inkişafı üçün mühəndislik və robototexnika sahəsində dərnəklər və təlimlər təşkil etmək və onları sahibkarlıq, biznes, innovasiya, startap, layihə idarəetməsi və s. kimi fərqli sahələrdə məlumatlandırmaq və maarifləndirmək əsas hədəflərdəndir”.
“Regionlarda yaşayan uşaqlar və gənclərin inkişafına təkan vermək və onların qarşısında böyük imkanlar açmaq məqsədilə 3 sentyabr 2021-ci il tarixindən Şəki “ASAN Həyat” kompleksində də “INNOLAND AREA” mərkəzi fəaliyyət göstərir” , – deyə, sonda qeyd edilir.
