Son yeniləmə: 10 Noyabr 2021 14:55
Bayraqdar.info – 8-9 noyabr tarixlərində Azərbaycan Turizm Bürosu Dünya Səyahət Bazarı sərgisində (WTM London) iştirak edib. Sərgidə Azərbaycanın turizm imkanlarını nümayiş etdirilib.
Bu barədə bayraqdar.info-ya noyabrın 10-da Dövlət Turizm Agentliyindən məlumat verilib.
Bildirilib ki, bu il hibrit formatda – həm fiziki, həm də onlayn iştirakla keçirilən tədbirə Azərbaycan tərəfindən iştirak virtual qaydada olub.
Sərgi müddətində ABŞ, Brazilya, Kanada, Hindistan və Avropa dövlətlərindən olan turizm və media şirkətləri, eyni zamanda blogerlərlə ümumilikdə 40-a yaxın görüş keçirilib.
Azərbaycana səyahət etməyi planlaşdıran görüş iştirakçıları pandemiya dövründə ölkəmizə səfər edərkən daxilolma prosedurları və hotellərdə tətbiq olunan qaydalarla maraqlanıblar.
Bundan əlavə, onlara Azərbaycanda turizmlə bağlı son yeniliklər, dağ yürüşü marşrutları, quş müşahidəçiliyi turları, eyni zamanda, işğaldan azad olunmuş ərazilərdə aparılan yenidənqurma işləri haqqında ətaflı məlumat verilib.
Qeyd edək ki, Azərbaycan 2002-ci ildən etibarən Dünya Səyahət Bazarı sərgisində iştirak edir.
