Bayraqdar.info – 8 Noyabr – Zəfər Günü münasibətilə Londondakı Fəxri Artilleriya Muzeyində ziyafət təşkil edilib.
Xəbər bayraqdar.info-ya noyabrın 9-da Müdafiə Nazirliyindən verilib.
“100 nəfərdən çox qonağın qatıldığı tədbir Azərbaycan Müdafiə Nazirliyinin Britaniyadakı hərbi attaşelik aparatının təşkilatçılığı və Azərbaycanın Britaniyadakı səfirliyinin dəstəyi ilə keçirilib.
Tədbirdə Britaniya Parlamentinin üzvləri, Londonda akkreditə olunmuş bir çox səfirliklərin nümayəndələri, o cümlədən Azərbaycana dost dövlətlərin səfirləri, çoxsaylı ölkələrin hərbi attaşeləri, media nümayəndələri, Britaniyadakı Azərbaycan diasporunun fəalları iştirak ediblər.
“Tədbiri açıq elan edən Böyük Britniyadakı və Şimali İralndiya Krallığındakı səfiri Elin Süleymanov 8 Noyabr – Zəfər Gününün müasir Azərbaycan tarixindəki müstəsna əhəmiyyətindən danışıb. O qeyd edib ki, bir il öncə Azərbaycan torpaqlarını işğaldan azad etməklə təkcə öz ərazi bütövlüyünü deyil, həmçinin tarixi ədaləti bərpa edib, beynəlxalq hüququn norma və prinsiplərinin yerinə yetirilməsini təmin edib. Səfir Süleymanov 9 noyabr tarixində daha bir əlamətdar tarixi – dövlətçilik rəmzlərindən biri olan Bayraq günü barədə də məlumat verib.
“Daha sonra çıxış edən Azərbaycan ordusunun Londondakı hərbi attaşesi polkovnik Vüqar Əhmədov Silahlı Qüvvələrin yaranmasının tarixindən, müstəqilliyin bərpa olunmasından sonrakı ilk dövrlərdə çətin ordu quruculuğundan danışıb.
Tədbirdə çıxış edən Britaniya Parlamentinin Lordlar Palatasının üzvü Lord Deyvid Evans Azərbaycan xalqını qələbə münasibəti ilə təbrik edib, O, Azərbaycanın yaxın dostu olduğunu, Azərbaycan xalqına dərin rəğbət hissi bəslədiyini qeyd edib. Lord Evans Vətən müharibəsində əldə edilmiş qələbəmizə həsr etdiyi şerini səsləndirərək “nə yaxşı ki, Azərbaycan Qarabağı geri qaytardı deyib”. Britaniya ilə Azərbaycan arasında uzun illər davam edən əməkdaşlıqdan da bəhs edən Lord ölkəsinin bundan sonra da Azərbaycanla əməkdaşlığı davam etdirməkdə və daha da gücləndirməkdə maraqlı olduğunu ifadə edib.
“Ziyafət zamanı Britaniyada yaşayan Azərbaycanlı musiqiçilər – əməkdar incəsənət ustası, tarzən Rafiq Rüstəmov, skripkaçı Səbinə Rakçeyeva, eləcə də əslən Türkiyəli opera ifaçısı Oya Ərgünün ifasında Azərbaycanın milli və klassik musiqiləri səsləndirilib. Artilleriya muzeyi binasına Azərbaycan bayrağı və Xarı bülbül simvolları işıqlı proyeksiya ilə əks etdirilib.
“Tədbirin sonunda Müslüm Maqomayevin “Azərbaycan” mahnısı və digər Azərbaycan musiqiləri fonunda tərtib edilmiş təntənəli atəşfəşanlıq olub.
“Sonda 15 dəqiqə davam edən atəşfəşanlıqda London səması Azərbaycan bayrağının rənglərinə bürünüb”, – deyə xəbərdə bildirilir.
