Bayraqdar.info – “Qazaxıstanın paytaxtı Nur-Sultanda Beynəlxalq Türk Akademiyası, Macarıstanın Qazaxıstandakı səfirliyi və Nazarbayev Universitetinin birgə təşkilatçılığı ilə görkəmli macar türkoloqu Armin Vamberiyə həsr olunan “Armin Vamberi – Orta Asiyada türk xalqlarını tədqiq edən ilk macar alim” adlı konfrans keçirilib.”
Bu xəbəri oktyabrın 28-də Beynəlxalq Türk Akademiyası yayıb.
Xəbərdə daha sonra deyilir: “Konfransda Beynəlxalq Türk Akademiyasının prezidenti Darxan Kıdırəli, Macarıstan səfirliyinin müvəqqəti işlər vəkili Aniko Denge, Qırğızıstan və Özbəkistanın Qazaxıstandakı səfirləri, Azərbaycan, Özbəkistan, Türkiyə, Macarıstan, Polşa səfirliyinin təmsilçiləri, Xarici İşlər Nazirliyinin nümayəndələri, tanınmış alim və tədqiqatçılar iştirak edib.
“Armin Vamberinin Beynəlxalq Türk Akademiyası tərəfindən nəşr olunan “Mərkəzi Asiyaya səyahət” kitabının təqdimatı olub. Görkəmli səyyahın “Türküstan” seriyası çərçivəsində nəşr olunan əsərində türk xalqlarının tarixi və mədəniyyəti, etnoqrafiyası və coğrafiyasından bəhs olunur. Əsər ilk dəfə Sankt-Peterburqda rus dilində nəşr edilib, sonralar Türküstan general-qubernatoru Kaufmanın təşəbbüsü ilə hazırlanmış məşhur “Türküstan” toplusunun 12-ci cildinə daxil edilib. Türk Akademiyası türkoloqun bu əsərini ilkin formasına uyğun olaraq yenidən çapdan çıxarıb”.
“Tədbir çərçivəsində Armin Vamberinin həyat və yaradıcılığına həsr olunan sərgi də keçirilib. Sərginin açılışını Macarıstan Elmlər Akademiyasından tanınmış macar türkoloq David Somfai edib”, – deyə xəbərdə bildirilir.
Daha sonra qeyd edilir ki, “Armin Vamberi həyatını elmə həsr etmiş böyük alim və macar türkologiyasının banilərindən biridir. Onun “Etnoloji-etnoqrafik baxımdan türk irqləri”, “Macar və türk-tatar söz birləşmələri”, “Uyğur abidələri və Kutadqu Bilik”, “Türk-tatar dillərinin etimoloji lüğəti”, “Macarların mənşəyi”, “Şeybaninamə – özbək qəhrəmanlıq dastanı”, “Monqolustan və Sibirin qədim türk yazı abidələri barədə qeydlər” kitabları məşhurdur”.
