Bayraqdar.info – Hazırda dünyada bəşəriyyətin üzləşdiyi ən böyük çağırışlardan birinin iqlim dəyişiklikləri ilə bağlıdır. Bunu iqtisadiyyat naziri Mikayıl Cabbarov deyib.
Nazirlikdən bayraqdar.info-ya oktyabrın 28-də verilən məlumata görə, Asiya İnfrastruktur İnvestisiya Bankının (AİİB) Müdirlər Şurasının 6-cı İllik Toplantısı keçirilib.
Toplantı çərçivəsində keçirilən “Müdirlərin Dəyirmi Masası”nda çıxış edən M.Cabbarov dünyanın iqlim dəyişikliyi məsələsinə fokuslandığını, Paris İqlim Sazişində əksini tapmış məqsədlərə çatmaq üçün dövlətləri yeni, daha düzgün yanaşmalara sövq etdiyini vurğulayıb.
Qeyd edilib ki, AİİB-in “yaşıl” və dayanıqlı gələcəyin təmin olunmasına yönəlmiş fəaliyyəti önəmlidir. 2020-ci ildə AİİB-in dünyada dayanıqlı infrastruktura töhfəsi 1,2 milyard dollar təşkil edib və iqlimlə bağlı olan 13 layihə maliyyələşdirilib.
Nazir Bankın üzv ölkələrə “yaşıl” və güclü iqtisadiyyat qurmaqda dəstəyini davam etdirməsi barədə müzakirələrin əhəmiyyətini qeyd edib.
Nazir bu istiqamətdə ölkəmizdə həyata keçirilən tədbirlər barədə də məlumat verib. M.Cabbarov növbəti 10 il üçün müəyyənləşdirilmiş Azərbaycanın Milli Prioritetləri çərçivəsində iqtisadiyyatın “yaşıl” və davamlı inkişafına, həmçinin işğaldan azad edilmiş ərazilərimizdə aparılan genişmiqyaslı bərpa-quruculuq işlərində “yaşıl” və “ağıllı” konsepsiyaların tətbiqinə xüsusi diqqət yetiriləcəyini bildirib.
Nazir Bankın üzv ölkələrin inkişafında və iqtisadi artımında rolunu qeyd edib, dəstək tədbirlərinin bundan sonra da davam edəcəyinə əminliyini ifadə edib.
Toplantıda AİİB-in 2020-ci il üzrə illik hesabatı qəbul edilib, növbəti illik toplantının 2022-ci ilin oktyabrında Rusiyanın paytaxtı Moskvada keçirilməsi qəraraalınıb, qarşıdakı dövr üçün vəzifələr və s. məsələlər müzakirə olunub.
